Qyrǵyzstan jańa sýdıalardy tańdaýdyń elektrondy júıesin engizýdi josparlap otyr
BІShKEK. KAZINFORM — Qyrǵyzstan prezıdenti Sadyr Japarov sot júıesine aldaǵy úsh jylda sheshilýi tıis jańa mindetter qoıdy, dep habarlaıdy Kazinform menshikti tilshisi.
Qyrǵyzstan sýdıalarynyń XIII sezinde prezıdent Sadyr Japarov sot bıligi saıası yqpal men syrtqy qysymnan táýelsiz bolýy kerek dep basa aıtty. Onyń aıtýynsha, jumystyń ashyqtyǵyn qamtamasyz etý jáne sybaılas jemqorlyq táýekelderin azaıtý úshin elde jańa sýdıalardy irikteý júıesin jedel túrde jetildirý qajet.
— Bas qalaǵa elimizdiń túkpir-túkpirinen amalsyz kelýge májbúr bolǵan azamattardyń qarjylyq jáne ýaqyt shyǵyndaryn azaıtatyn qujattardy tapsyrýdyń elektrondy júıesin engizý qajet. Sýdıalardy irikteý protsesin jedeldetetin, onyń naqtylyǵy men ádildigin qamtamasyz etetin derekterdi óńdeýdiń avtomattandyrylǵan mehanızmin iske qosý. Jańadan taǵaıyndalǵan sýdıalardyń kásibı daıarlyǵyna qatysty kóptegen máselelerdi sheshýge múmkindik beretin sýdıalyqqa kandıdattardyń kadrlyq rezervin qurý — dep tapsyrdy ol.
Sadyr Japarov sondaı-aq memlekettik baǵdarlama aıasynda jeke sot oryndaýshylar ınstıtýtyn engizý josparlaryna toqtaldy. Ol sot júıesi sýdıalardyń táýelsizdigin nyǵaıtýǵa, sot tóreliginiń tıimdiligin arttyrýǵa jáne sot organdary jumysynyń ashyqtyǵyn qamtamasyz etýge baǵyttalǵan zańnamalyq bastamalardy qajet etetinin atap ótti. Osyǵan baılanysty Qyrǵyz Respýblıkasynyń Prezıdenti Joǵarǵy Sotty zań shyǵarý bastamasy quqyǵyn belsendirek paıdalanýǵa shaqyrdy.
Buǵan deıin Qyrǵyzstanda Parlament qurýdyń jańa tetigi qarastyrylyp jatqanyn jazǵan bolatynbyz.
Keshe Qyrǵyzstanda aq qalpaq jáne ulttyq kıim kúni atalyp ótti.