Qyrǵyzstan zergerleri QQS-tan bosatyldy

ASTANA. KAZINFORM — Qyrǵyzstanda zergerlik buıymdardy jasaıtyndar satyp alatyn shıkizat úshin qosylǵan qun salyǵyn tólemeıdi, dep habarlaıdy Kazinform menshikti tilshisi.  

QR Memlekettik salyq qyzmetiniń derekterine sáıkes, qyrǵyzstandyq zergerler budan bylaı elge ákelinetin jáne zergerlik buıymdardy jasaý úshin paıdalanylatyn quramynda metall bar kenderge, kontsentrattarǵa, qorytpalarǵa jáne tazartylǵan metaldarǵa QQS tóleýdiń qajeti joq.

Salyq salý salasyndaǵy Qyrǵyzstannyń keıbir zańnamalyq aktilerine tıisti ózgerister engizildi.

QR Memlekettik salyq qyzmetiniń tóraǵasy Almambet Shyqmamatovtyń sózinshe, shıkizat ımportyna QQS-ty alyp tastaý zergerlik salanyń damýyn yntalandyrady.

— Kez kelgen yntalandyrý — bul bıznesti damytý, bıznesti damytý — bul paıdanyń ósýi, kóleńkeli sektordyń azaıýy. Óıtkeni qara naryqta shıkizat satyp alýdyń, jumys oryndarynyń ulǵaıýynyń máni joq. Nátıjesinde — qazynaǵa túsetin salyq kóbeıedi. Shıkizat ımportyna QQS-ty alyp tastaý ony satyp alý shyǵyndaryn avtomatty túrde azaıtady jáne kásipkerlerge qarajatty basqa qajettilikterge qaıta qarastyrýǵa múmkindik beredi, — dep túsindirdi ol.

Memlekettik salyq qyzmeti atap ótkendeı, zergerler úshin QQS-ty alyp tastaý jergilikti zergerlik buıymdardyń ózindik qunynyń tómendeýine áser etýi kerek. Sonymen qatar, kóleńkeli ekonomıka deńgeıi tómendeıdi. Al shıkizat shyǵyndarynyń azaıýy otandyq óndirýshilerdiń qarjylyq jaǵdaıyn jaqsartady, olardyń kirisin arttyrady. Budan bólek óndiristi keńeıtýge, ónim sapasyn arttyrýǵa jáne jańa tehnologııalardy engizýge yntalandyrady.

Osyǵan deıin Qyrǵyzstan bıligi bıznesti tekserýge qoıylǵan shekteýdi alyp tastaǵany belgili boldy.