Qyrǵyzstan zańsyz mıgranttarǵa aıyppulsyz elden shyǵýǵa múmkindik berdi
ASTANA. KAZINFORM — Qyrǵyzstanda kóshi-qon zańnamasyn buza otyryp el aýmaǵynda júrgen shetel azamattaryna qatysty jańa shara qabyldandy.
Tıisti jarlyqqa el prezıdenti qol qoıdy.
Qujatqa sáıkes, elde bolý tártibin buzǵan shetel azamattary men azamattyǵy joq adamdar Qyrǵyzstan aýmaǵynan óz erkimen ákimshilik jaýapkershilikke tartylmaı shyǵa alady.
Jarlyqtyń kúshi mynadaı tulǵalarǵa qoldanylady:
vızasynyń nemese turýǵa yqtııarhatynyń (yqtııarhat) qoldanylý merzimi aıaqtalǵandarǵa;
turýǵa yqtııarhatynyń kúshi joıylǵandarǵa;
tirkeýi nemese jumys isteýge ruqsaty joq ne olardyń merzimi ótip ketkenderge;
zańda belgilengen elde bolý merzimi aıaqtalǵandarǵa;
Qyrǵyzstanda bolýdyń naqty maqsaty elge kirý kezinde kórsetilgen maqsatqa sáıkes kelmeıtinderge.
Olar bul múmkindikti paıdalaný úshin 2026 jylǵy 1–31 shilde aralyǵynda turǵan jeri boıynsha Qyrǵyzstannyń ishki ister organdarynyń aýmaqtyq bólimshelerine baryp, shyǵý vızasyn rásimdeýge qajetti hat alýy tıis.
Odan keıin úshinshi tulǵalar men deldaldardyń kómeginsiz, óz betinshe elektrondyq vıza júıesiniń resmı saıty arqyly shyǵý vızasyn rásimdeýge ótinish berýi qajet.
Syrtqy ister mınıstrliginiń málimetinshe, mundaı azamattarǵa shyǵý vızasy vızalyq alymsyz rásimdeledi jáne kóshi-qon zańnamasyn buzǵany úshin ákimshilik aıyppul salynbaıdy.
Buǵan deıin Qyrǵyzstanda eńbek mıgranttaryna parlament saılaýyna qatysýǵa ruqsat berilýi múmkin ekeni habarlanǵan bolatyn.
