Qyrǵyzstan zańsyz kóshi-qonǵa qarsy kúresti kúsheıtti
ASTANA. KAZINFORM – Qazaqstandyq Kazinform agenttiginiń menshikti tilshisi habarlaǵandaı, zańsyz kóshi-qonǵa qarsy kúres aıasynda 10 maýsymnan keıin Qyrǵyzstanda barlyq quqyq qorǵaý organdarynyń qatysýymen «Nelegal» operatsııasy bastalady. Osyǵan baılanysty sheteldikterge eldegi mártebesin zańdastyrý nemese elden shyǵý usynyldy
Qyrǵyz Respýblıkasy Ulttyq qaýipsizdik memlekettik komıtetiniń (UQMK) málimetinshe, elde shamamen 5 myńǵa jýyq zańsyz mıgrant bar. Bıylǵy jyldyń basynan beri Qyrǵyzstanǵa 61 myń týrıst, 30 myń stýdent, 12 myń resmı eńbek mıgranty jáne ózge sanattaǵy 10 myń shetel azamaty kelgen.
— Kóptegen sheteldikter men olardy shaqyrýshy taraptar elge kirýdiń jeńildetilgen tártibin teris paıdalanyp otyr. Olar Qyrǵyzstanǵa týrıst nemese stýdent retinde kelip, is júzinde zańsyz eńbekpen aınalysady. Jumys berýshiler memlekettik alymnan jaltarý úshin sheteldikterdi vıza merzimin ýaqtyly uzartpaı jumysqa alady, bul kóshi-qon zańnamasyn buzý bolyp sanalady, — dep habarlady UQMK.
Elge zańsyz eńbek mıgranttarynyń jappaı qonystanýynyń aldyn alý, kóshi-qon ruqsattaryn berý jáne rásimdeý barysynda sybaılas jemqorlyqtyń jolyn kesý, kóshi-qon aǵymdaryn retteý jáne jetildirý maqsatynda Qyrǵyz Respýblıkasynda 2025 jylǵy 1 qańtardan bastap «QR-daǵy kóshi-qon úderisterin ońtaılandyrý sharalary týraly» Prezıdent Jarlyǵy iske asyrylyp jatyr.
Atalǵan jarlyq aıasynda 2025 jylǵy 10 maýsymǵa deıin Qyrǵyzstanda kóshi-qon zańnamasyn buza otyryp júrgen barlyq shetel azamaty óz mártebesin zańdastyrýy nemese elden ketýi tıis.
Buǵan deıin Qyrǵyzstanda shetel azamattarynyń zańsyz kóshi-qondy uıymdastyrǵany habarlanǵan bolatyn. 2024 jylǵy 5 qyrkúıekten bastap vızasyz rejımi bar shetel azamattaryn tirkeýdiń jańa tártibi kúshine endi. Sonymen qatar, sheteldik stýdentterge qatysty joǵary oqý oryndarynyń rektorlarynyń jeke jaýapkershiligi kúsheıtildi.
Aıta ketelik Qyrǵyzstanda esirtkige baılanysty qylmys úshin jaza qatańdatylǵany týraly jazǵan edik.