Qyrǵyzstan VI Dúnıejúzilik kóshpendiler oıyndarynyń medalin tanystyrdy
ASTANA. KAZINFORM — Qyrǵyzstannyń Dene shynyqtyrý jáne sport jónindegi memlekettik agenttigi VI Dúnıejúzilik kóshpendiler oıyndarynyń jeńimpazdary men júldegerlerine tabystalatyn altyn, kúmis jáne qola medaldardyń dızaınyn tanystyrdy. Bul týraly Bishkektegi Kazinform agenttiginiń menshikti tilshisi habarlaıdy.
Agenttiktiń málimetinshe, medal dızaıny qyrǵyz halqynyń dástúrli fılosofııasyna negizdelgen. Onyń ortalyq bóliginde Kóshpendiler oıyndarynyń resmı logotıpi bar.
Medaldardyń qos qyry da aıryqsha naqyshpen bezendirilgen. Ár júldege arnaıy tuǵyr qosa beriledi. Sportshylar ony júldege qosa berilgen ınterer estelik retinde saqtaı alady.
— VI Dúnıejúzilik kóshpendiler oıyndarynyń jeńimpazdary men júldegerleri osyndaı aıryqsha marapatqa ıe bolyp, álemdik kóshpendiler sportynyń tarıhynda atyn qaldyrady, — delingen agenttik habarlamasynda.
Aıta keteıik, 31 tamyzda Bishkektegi jańa stadıonda VI Dúnıejúzilik kóshpendiler oıyndarynyń ashylý saltanaty ótedi. Al Oıyndardyń negizgi jarystary men mádenı, ǵylymı sharalary 2-6 qyrkúıek kúnderi Ystyqkól oblysynyń Cholpon-Ata qalasy men Qyrchyn shatqalynda jalǵasady.
Maýsym aıynda Qyrǵyzstan VI Dúnıejúzilik kóshpendiler oıyndarynyń resmı beınerolıgin tanystyrdy. Buǵan deıin 2026 jylǵy Oıyndardyń boıtumary retinde qar barysy tańdalyp, oǵan Bataı degen esim berilgeni habarlanǵan.
VI Dúnıejúzilik kóshpendiler oıyndaryna 3 myńǵa jýyq sportshy qatysady.
Qyrǵyzstannyń Dene shynyqtyrý jáne sport jónindegi memlekettik agenttiginiń málimetinshe, VI Dúnıejúzilik kóshpendiler oıyndarynda kók bóri men kókpar jeke-jeke sport túri retinde ótedi.
Bishkektegi «Manas» halyqaralyq áýejaıy ShYU sammıti men Dúnıejúzilik kóshpendiler oıyndarynyń ótýine baılanysty 31 tamyz ben 1 qyrkúıekte arnaıy jumys rejımine kóshedi.
VI Dúnıejúzilik kóshpendiler oıyndaryna bıletterdiń baǵasy jáne qandaı is-sharalarǵa tegin qatysýǵa bolatyny týraly tolyq aqparatty osy jerden oqı alasyz.
31 tamyzda VI Dúnıejúzilik kóshpendiler oıyndarynyń saltanatty ashylýyna keletin kórermenderdi «Bishkek Arena» stadıonyna tegin shattl avtobýstary jetkizedi.
25 tamyzda Qyrǵyzstanda VI Dúnıejúzilik kóshpendiler oıyndaryna arnalǵan kúmis moneta aınalymǵa engizildi.
Aqzat Jıenalına
