Qyrǵyzstan VI Dúnıejúzilik kóshpendiler oıyndaryna arnalǵan kúmis monetany aınalymǵa shyǵardy
ASTANA.KAZINFORM — Qyrǵyzstan Respýblıkasynyń Ulttyq banki 2026 jyldyń 25 tamyzynan bastap «Dúnıejúzilik kóshpendiler oıyndary» serııasynan «Taıǵan jarysh» kúmis kollektsııalyq monetasyn aınalymǵa shyǵarady, dep habarlaıdy agenttiktiń Bishkektegi tilshisi.
Ulttyq banktiń málimeti boıynsha, monetanyń aldyńǵy jaǵynda qyrǵyz taýlarynyń fonynda jarysyp júrgen úsh taıgan beınelengen. Joǵarǵy jaǵynda «Taıǵan jarysh» degen jazý jáne Dúnıejúzilik kóshpendiler oıyndarynyń resmı emblemasy ornalasqan.
Monetanyń artqy jaǵynda, joǵarǵy jáne sol jaǵynda «Dúınólúk kóchmóndór oıýndary/World Nomad Games» degen jazý bar. Monetanyń ortasynda Qyrǵyzstan Respýblıkasynyń eltańbasy jáne qyrǵyz taıǵany basynyń jaqynnan túsirilgen sýreti beınelengen. Tómengi jaǵynda shyǵarylǵan jyly (2026) jazylǵan.
Monetalardyń salmaǵy 28,28 gramm, al ólshemi 38,61 h 38,61 mm. Ár monetanyń nomınaly 10 som, al jalpy sany 1000 dana. Olardy Ulttyq banktiń kassasynan 8900 somǵa satyp alýǵa bolady.
«Taıǵan Jarysh» kollektsııalyq monetasy Qyrǵyz Respýblıkasynda resmı túrde zańdy tólem quraly retinde tanylǵan.
Buǵan deıin habarlaǵanymyzdaı, Qyrǵyzstan ShYU-nyń 25 jyldyǵyna arnalǵan kúmis monetany aınalymǵa engizdi.
