Qyrǵyzstan VI Dúnıejúzilik kóshpendiler oıyndaryna daıyndyqty aıaqtap jatyr
ASTANA. KAZINFORM — VI Dúnıejúzilik kóshpendiler oıyndaryn daıyndaý jáne ótkizý jónindegi Uıymdastyrý komıtetiniń otyrysynda jaýapty memlekettik organdarǵa daıyndyq sharalaryn aıaqtaý jumystaryn kúsheıtý tapsyryldy, dep habarlaıdy Kazinform agenttiginiń Bishkektegi menshikti tilshisi.
VI Dúnıejúzilik kóshpendiler oıyndaryna daıyndyq jumystary sońǵy kezeńge ótti. Otyrysta halyqaralyq is-sharanyń jalpy baǵdarlamasy, mádenı, sporttyq jáne ǵylymı baǵdarlamalary, sondaı-aq Oıyndardyń jabylý saltanatynyń tujyrymdamasy qaraldy.
Sonymen qatar qatysýshylardy tasymaldaý jáne ornalastyrý, akkredıtteý, medıtsınalyq jáne sanıtarııalyq-epıdemıologııalyq qamtamasyz etý, sondaı-aq Oıyndar ótetin negizgi nysandardyń daıyndyǵy talqylandy. Olardyń qatarynda Qyrchyn etnoqalashyǵy, Kóshpendiler órkenıeti ortalyǵy, «Rýh-Ordo» kesheni, ıppodrom jáne sport alańdary bar.
Eske sala keteıik, Qyrǵyzstanda 31 tamyz ben 6 qyrkúıek aralyǵynda VI Dúnıejúzilik kóshpendiler oıyndary ótedi. Oıyndardyń ashylý saltanaty el astanasyndaǵy jańa stadıonda uıymdastyrylady.
VI Dúnıejúzilik kóshpendiler oıyndarynyń negizgi sporttyq, mádenı jáne ǵylymı baǵdarlamasy 2–6 qyrkúıek aralyǵynda Ystyqkól oblysynyń Cholpon-Ata qalasy men Qyrchyn shatqalynda jalǵasady.
Buǵan deıin 2026 jylǵy Dúnıejúzilik kóshpendiler oıyndarynyń tumary retinde ilbis tańdalǵany habarlanǵan bolatyn. Oǵan Bataı degen esim berildi.
Mamyr aıynda Bishkekte Oıyndardyń bastalýyna 100 kún qalǵanyn kórsetetin elektrondy keri sanaq taqtasy resmı túrde iske qosyldy.
Qyrǵyzstanda Dúnıejúzilik kóshpendiler oıyndarynyń rýhanı jáne úılestirýshi ortalyǵy mártebesin elge zań júzinde bekitý usynylyp otyr.
Qyrǵyz Respýblıkasynyń Dene shynyqtyrý jáne sport jónindegi memlekettik agenttiginiń málimetinshe, VI Dúnıejúzilik kóshpendiler oıyndarynda kókbóri men kókpar jeke-jeke sport túri retinde ótkiziledi.
Sondaı-aq Dúnıejúzilik kóshpendiler oıyndaryna qatysatyn Qazaqstan ulttyq quramasynyń quramy tolyq jasaqtaldy. Quramaǵa 155 sportshy, 49 jattyqtyrýshy jəne ózge de mamandar endi.
