Qyrǵyzstan ulttyq brendpen jańǵaq eksportyn keńeıtýge nıetti
ASTANA.KAZINFORM – Qyrǵyzstanda «Tabıǵı qyrǵyz jańǵaǵy» brendiniń ulttyq marketıngilik jospary ázirlendi. Ónimdi ishki jáne halyqaralyq naryqta ilgeriletý josparlanyp otyr, dep habarlaıdy Kabar.
Jospar BUU Azyq-túlik jáne aýylsharýashylyq uıymynyń qoldaýymen ázirlendi. Onyń qorytyndy talqylaýy Qyrǵyzstannyń Sý resýrstary, aýyl sharýashylyǵy jáne qaıta óńdeý ónerkásibi mınıstrliginde mınıstrdiń orynbasary Rysgúl Ákimjanovanyń qatysýymen ótti.
Brendti damytýdyń negizgi maqsaty – qyrǵyz jańǵaǵyn ishki jáne halyqaralyq naryqta ilgeriletý, onyń básekege qabilettiligin arttyrý jáne jergilikti qaýymdastyqtar úshin jańa múmkindikter jasaý.
Jyl saıyn Qyrǵyzstanda 44 myń tonnadan astam jańǵaq jınalady. Ony jınaý jáne satý kóptegen jergilikti turǵyndar úshin tabys kózi bolyp sanalady.
Ulttyq marketıng jospary brendtiń logotıpi men vızýaldy stılin ázirleýdi, ónimder men QR-kodtar júıesin tańbalaýdy engizýdi, áleýmettik jelilerde ilgeriletýdi, sondaı-aq Halyqaralyq kórmeler men eksporttyq naryqtarda qyrǵyz jańǵaǵyn usynýdy kózdeıdi.
Kelesi kezeńde organıkalyq sertıfıkattaý, geografııalyq kórsetkishterdi tirkeý jáne jańǵaq ormandaryn turaqty basqarý máselelerin qarastyrý josparlanyp otyr.
Aıta keteıik, Qyrǵyzstan qurylys materıaldarynyń birqatar túrine ýaqytsha tyıym engizdi.
