Qyrǵyzstan Ulttyq banki myń tonnaǵa deıin altyn saqtaı alady

ASTANA. KAZINFORM – Qyrǵyzstan prezıdenti Sadyr Japarov Bishkekte Ulttyq banktiń jańa ǵımaratynyń ashylý saltanatynda sóılegen sózinde endi eldiń altyn qoryn kólemi myń tonnaǵa deıingi jańa qoımada saqtaýǵa múmkindik bar ekenin málimdedi.

Memleket basshysynyń aıtýynsha, buǵan deıin Qyrǵyzstanda altyndy saqtaý boıynsha tıisti jaǵdaıdyń bolmaýy belgili bir qıyndyqtar týǵyzǵan.

«Buryn memleket óz qorynyń bir bóligin shetelde saqtaýǵa májbúr boldy. Endi Ulttyq bank halyqaralyq standarttarǵa saı eń iri qoımany ıelenip otyr, ol myń tonnaǵa deıin altyn saqtaýǵa qabiletti. Osylaısha, Qyrǵyzstan óz altyn qoryn senimdi túrde saqtap qana qoımaı, sheteldik seriktesterge de osyndaı qyzmet kórsete alady», – dedi Sadyr Japarov.

Prezıdent sondaı-aq memlekettiń basty mindeti halyqaralyq standarttar men ulttyq múddeler arasyndaǵy tepe-teńdikti saqtaý ekenin atap ótti.

«Memlekettiń qýaty tek altyn qory men tabıǵı baılyǵymen emes, eń aldymen halyqtyń senimimen, zań ústemdigimen jáne azamattarǵa laıyqty ómir qamtamasyz ete alýymen ólshenedi. Ulttyq bank osy qundylyqtardyń saqtaýshysy bolýy tıis», – dep túıindedi Qyrǵyzstan basshysy.

Buǵan deıin Qyrǵyzstan Ulttyq banki bazalyq mólsherlemeni 10 paıyz deńgeıine deıin kótergeni habarlanǵan bolatyn.