Qyrǵyzstan Ulttyq banki eseptik mólsherlemeni 13% kóleminde saqtap qaldy

Qyrǵyzstanda 28 qarashadan bastap QR Ulttyq bankiniń eseptik mólsherlemeni 13% kóleminde saqtap qalý týraly sheshimi kúshine endi, dep habarlaıdy Kazinform agenttiginiń tilshisi.

QRUB Kommýnıkatsııa jáne halyqaralyq seriktestik basqarmasy basshysynyń orynbasary Ilıchbek Sýltankýlov baspasóz konferentsııasy kezinde Ulttyq banktiń qarjy-nesıe saıasaty ınflıatsııany tómendetýge áser etkenin aıtty. Jyldyq ınflıatsııa kórsetkishi birtindep tómendep jatyr. Máselen, qarashada ol 8% bolyp, 2023 jyldyń basyndaǵy kórsetkishten 6,7 protsenttik pýnktke tómen tústi.

Azyq-túlik taýarlary arasynda ınflıatsııa baıaýlap qalǵany baıqalady, oǵan keı taýarlardyń baǵasyn memlekettik retteý sharalary sebep bolǵan. Ol 2023 jyldyń basynda 15,8% bolsa, 2023 jyldyń qarashasynda 3,9%-ke deıin tómendedi.

Qyrǵyz Respýblıkasynyń ekonomıkasy ósip jatqany baıqalady: 2023 jyldyń qańtar-qazan aralyǵynda JІÓ ósimi 4,5% jetti. Bul – 6,5% quraıtyn Kýmtordy qospaǵandaǵy kórsetkish. Negizinen oǵan qyzmet kórsetý jáne óńdeý ónerkásibi salasynyń belsendiligi kóp úles qosyp jatyr. Іshki tutynýshylar sanynyń artýyna tutynýshylarǵa nesıe berý kóbeıgeni jáne shynaıy jalaqy óskeni sebep bolǵan tárizdi.

Іske asyrylyp jatqan qarjy-nesıe sharalary eldegi ınflıatsııa protsesine syrtqy jáne ishki faktorlardyń jaǵymsyz áserin azaıtady. El ekonomıkasyndaǵy faktorlardy nazarǵa ala otyryp, eseptik kórsetkishti 13% deńgeıinde saqtaý týraly sheshim qabyldandy. Ol ortasha jedel kezeńde ınflıatsııany 5-7%-ke jetkizýge septigin tıgizedi.

Ulttyq bank syrtqy jáne otandyq ekonomıkalyq ahýaldy únemi baqylap otyrady. Qandaı da qaýip tóngen jaǵdaıda qarjylyq retteýshi aqsha saıasatyna qosymsha túzetý engizýi múmkin.