Qyrǵyzstan Ulttyq banki eseptik mólsherlemeni 11%-ǵa deıin kóterdi

BІShKEK. KAZINFORM – Qyrǵyzstan Respýblıkasynyń Ulttyq banki negizgi mólsherlemeni 100 bazıstik pýnktke, 11%-ǵa deıin kóterdi. Sheshim 2025 jyldyń 25 qarashasynda kúshine enedi, dep habarlaıdy Kazinform menshikti tilshisi. 

Retteýshiniń málimetinshe, 2025 jyldyń basynan beri ınflıatsııa 7,3%-dy, al jyldyq kórsetkish 8,9%-dy qurady. Eldegi ishki baǵalarǵa syrtqy ekonomıkalyq faktorlar aıtarlyqtaı áser etetini atap ótildi. Álemdik azyq-túlik baǵalarynyń ósýi jáne kórshi elderdegi turaqty joǵary ınflıatsııa ımporttyq taýarlardyń qunyna qysym jasap, bul óz kezeginde aǵymdaǵy baǵa dınamıkasyn qalyptastyryp otyr.

Azyq-túlik emes taýarlar salasynda baǵanyń eń úlken ósýi tirkeldi. Bul negizinen ımporttyq janar-jaǵarmaı materıaldarynyń baǵasynyń ósýine, elektr energııasyna tarıfterdiń ósýine, ishki suranystyń artýyna jáne osy faktorlardyń saldary bolyp tabylatyn qosymsha áserlerge baılanysty boldy. Sonymen qatar, azyq-túlik baǵalary salystyrmaly túrde ustamdy ósimdi kórsetip otyr.

Eldegi ekonomıkalyq belsendilik joǵary deńgeıde qalyp otyr. Tutynýshylyq suranystyń joǵary bolýy jáne ınvestıtsııalyq belsendiliktiń artýy nátıjesinde 2025 jyldyń qańtarynan qazanyna deıin naqty JІÓ 10%-ǵa ósti. JІÓ-niń ósýine negizinen qyzmet kórsetý sektory, qurylys jáne ónerkásip úles qosyp otyr. Bul rette joǵary ishki suranys elge aqsha aýdarymdarynyń aǵyny, naqty jalaqynyń ósýi jáne tutynýshylyq nesıelendirýmen qoldaý taýyp otyr.

Eske sala ketsek, qazan aıynda Qyrǵyzstan Ulttyq banki negizgi paıyzdyq mólsherlemeni 10%-ǵa deıin kóterdi.