Qyrǵyzstan Ulttyq banki «EAEO – 10 jyl» kollektsııalyq monetasyn aınalymǵa shyǵardy
ASTANA. KAZINFORM – Qyrǵyzstannyń Ulttyq banki «Tarıhı oqıǵalar» serııasynyń «Eýrazııalyq ekonomıkalyq odaqqa – 10 jyl» kúmis kollektsııalyq monetasyn aınalymǵa engizdi. Bul týraly Kabar aqparat agenttigi jazdy.
Retteýshiniń habarlaýynsha, 2024 jyldyń 29 mamyrynda Eýrazııalyq ekonomıkalyq odaq týraly shartqa qol qoıylǵanyna 10 jyl tolady. Eýrazııalyq ekonomıkalyq odaq (EAEO) – múshe memleketter ekonomıkalarynyń turaqty damýy úshin jaǵdaı jasaý, taýarlardyń, qyzmetterdiń, kapıtaldyń jáne jumys kúshiniń EAEO sheńberinde biryńǵaı naryǵyn qalyptastyrýǵa umtylý, múshe memleketter halqynyń ómir súrý deńgeıin arttyrý múddesinde ulttyq ekonomıkalardy jan-jaqty jańǵyrtý, kooperatsııalaý jáne básekege qabilettiligin arttyrý maqsatynda qurylǵan aımaqtyq ekonomıkalyq ıntegratsııanyń halyqaralyq uıymy.
Odaqqa bes memleket: Armenııa, Belarýs, Qazaqstan, Qyrǵyzstan jáne Reseı múshelik etýde.
«Eýrazııalyq ekonomıkalyq odaq – 10 jyl» monetasynyń bet jaǵynda EAEO-nyń resmı emblemasy, onyń aınalasynda EAEO-ǵa múshe elderdiń týlary, sondaı-aq EAEO eltańbasynyń elementteri beınelengen. Sol jaǵynda EAEO-nyń mereıtoılyq datasy «10 jyl» jazylǵan. Monetanyń sheńberinde «Eýrazııa ekonomıkalyq birligi / Eurasian Economic Union» degen jazý bar.
Keri betinde dál ortada Qyrǵyz Respýblıkasynyń eltańbasy beınelengen. Monetanyń oń jaǵynda EAEO-ǵa múshe elderdiń ulttyq oıý-órnekteri, sondaı-aq metall synamasy (Ag 925) jáne monetanyń massasy (31,10 g) beınelengen. Joǵarǵy jáne tómengi bóliginde «Qyrǵyz Respýblıkasynyń Ýlýttýk banky/Natsıonalnyı bank Kyrgyzskoı respýblıkı» degen jazý bar. Sol jaǵynda monetanyń nomınaly (10), somnyń grafıkalyq tańbasy © jáne monetanyń shyǵarylǵan jyly «2024» kórsetilgen.
«Eýrazııalyq ekonomıkalyq odaq – 10 jyl» kollektsııalyq monetasy Qyrǵyz Respýblıkasynyń aýmaǵynda resmı tólem quraly mártebesine ıe.
Árbir kollektsııalyq moneta akrıl kapsýlasyna salynǵan jáne sapa sertıfıkaty qosa berilgen jeke qorapqa salynǵan.
Kollektsııalyq monetalar Qyrǵyz Respýblıkasy Ulttyq bankiniń kassalarynda 5 780 som baǵasymen, sondaı-aq nýmızmatıkalyq qundylyqtardy satý saıty arqyly satylady.
