Qyrǵyzstan TJM basshysy taǵaıyndalǵannan keıin úsh aptadan soń qyzmetinen bosatyldy
BІShKEK. KAZINFORM — Qyrǵyzstanda Tótenshe jaǵdaılar mınıstri Ýrmatbek Shamyrkanov prezıdent jarlyǵymen qyzmetinen bosatyldy, dep habarlaıdy Kazinform-nyń Bishkektegi menshikti tilshisi.
Prezıdenttiń baspasóz hatshysy Asqat Alagózov áleýmettik jelidegi paraqshasynda otstavkaǵa ketý sebebin túsindirdi.
— Jańa mınıstrdiń qyzmetinen bosatylýyna Ýrmatbek Shamyrkanovtyń Tótenshe jaǵdaılar mınıstriniń orynbasary qyzmetin atqarǵan kezde para aldy degen kúdikke ilinýi sebep boldy, — dep jazdy ol.
Aqparatqa sáıkes, 2025 jyldyń jazynda ol atalǵan mınıstrlik bólimshesindegi qyzmetkerlerdiń birinen laýazymyn kóterý úshin para talap etken.
Qyzmetkerdiń aıtýynsha, ol kelisilgen somanyń jartysyn sol kezdegi Tótenshe jaǵdaılar mınıstriniń orynbasary Ý.Shamyrkanovtyń elektrondy ámııanyna aýdarǵan.
— Shamyrkanov mınıstr bolyp taǵaıyndalǵannan keıin qyzmetker somanyń qalǵan jartysyn aýdara almaıtynyn habarlady. Onyń aıtýynsha, mınıstr ony Batken oblysyndaǵy bólimshege aýystyrdy. Qyzmetker prezıdent Sadyr Japarovqa júgindi, — dep habarlady prezıdenttiń baspasóz hatshysy.
Qyrǵyzstan basshysy Bas prokýratýraǵa málimdemede aıtylǵan aıyptaýlardy tekserýdi tapsyrdy. Tergeý málimdemede kórsetilgen faktilerdi rastady.
Eske sala ketsek, 2026 jyldyń 19 aqpanynda Ýrmatbek Shamyrkanov Tótenshe jaǵdaılar mınıstri bolyp taǵaıyndaldy. Sol kúni Ýmgalbek Shabdanbekov Qyrǵyzstan Ulttyq qaýipsizdik memlekettik komıtetiniń tóraǵasy atandy.
Qyrǵyzstan prezıdenti sońǵy kadrlyq sheshimder neden týyndaǵanyn túsindirdi.
Osyǵan deıin Qyrǵyzstan parlamentine jańa spıker saılanǵanyn jazdyq.
