Qyrǵyzstan Tájikstanmen shekarada qorshaý ornatýdy aıaqtady
ASTANA. KAZINFORM — Qyrǵyzstannyń Memlekettik shekara qyzmeti qyrǵyz-tájik shekarasynyń Batken oblysynan ótetin bóliginde aýqymdy ınjenerlik jumystardy aıaqtady, dep habarlaıdy Kazinform agenttiginiń Bishkektegi menshikti tilshisi.
Qyrǵyzstan Respýblıkasynyń Memlekettik shekara qyzmetiniń málimeti boıynsha, 2025-2026 jyldary Batken jáne Leılek aýdandarynda 327,7 km-den astam shekara qorshaýlary ornatyldy, al 338,5 km dala joldary salyndy.
Memlekettik shekarany ınjenerlik jabdyqtaýda ártúrli qorshaýlar qoldanyldy. Shekara ótetin aýmaqtardyń jer bederi men jaǵdaılaryna baılanysty ártúrli qurylymdar tańdaldy.
Vedomstvonyń málimetinshe, shekara jazyq jáne taýly, bıik taýly jáne shalǵaı aýdandardan ótedi. Tik betkeıler sekildi qıyn jer bederleri qurylys materıaldary men jabdyqtaryn jetkizýdi qıyndatty.
— Memlekettik shekara qyzmetimen qatar, qorǵanys, tótenshe jaǵdaılar, ishki ister mınıstrlikteriniń jáne Memlekettik keden qyzmetiniń bólimsheleri jumysqa tartyldy. Memlekettik organdardyń úılesimdi yntymaqtastyǵynyń arqasynda shekaranyń eń kúrdeli jáne jetý qıyn ýchaskelerinde de aýqymdy ınjenerlik jumystar eńserildi. Qurylys kezeńinde ornatylǵan qorshaýlardyń sapasy men tehnıkalyq talaptardyń saqtalýy úzdiksiz baqylaýda boldy, — delingen málimdemede.
Eske sala keteıik, 2025 jyldyń naýryzynda Qyrǵyzstan men Tájikstan memlekettik shekara boıynsha kelisimge keldi.
