Qyrǵyzstan, Tájikstan jáne Ózbekstan shekarasynda saýda-ekonomıkalyq saıabaq salynady
ASTANA.KAZINFORM — Qyrǵyzstan, Ózbekstan jáne Tájikstan shekarasynda «Dostyq» halyqaralyq saýda-ekonomıkalyq saıabaǵy salynady, dep habarlaıdy Kazinform agenttiginiń Bishkektegi menshikti tilshisi.
Batken oblysyna jumys sapary barysynda Qyrǵyzstan prezıdenti Sadyr Japarovqa 100 gektarlyq saıabaqtyń tujyrymdamasy men bas jospary usynyldy. Keshen ákimshilik, týrıstik, logıstıkalyq, óndiristik, kommertsııalyq jáne saıabaq aımaqtaryn qamtıdy. 5000-nan astam jumys orny qurylady dep josparlanǵan.
Joba saýda-logıstıkalyq baılanystardy damytýǵa, ınvestıtsııalar tartýǵa jáne jańa ekonomıkalyq múmkindikter jasaýǵa baǵyttalǵan. Tujyrymdamada sondaı-aq týrıstik ınfraqurylymdy damytý, halyqaralyq mádenı is-sharalardy, etnıkalyq festıvaldar men kórmeler ótkizý qarastyrylǵan, bul mádenı-gýmanıtarlyq baılanystardy nyǵaıtýǵa jáne Uly Jibek jolynyń tarıhı murasyn nasıhattaýǵa kómektesedi.
Sadyr Japarov «Dostyq» halyqaralyq saýda-ekonomıkalyq saıabaǵy jobasyn sátti júzege asyrý úsh el arasyndaǵy tyǵyz yntymaqtastyq pen birlesken jumys arqyly múmkin ekenin atap ótti.
Qyrǵyzstan kóshbasshysy ózara qoldaý arqyly bul joba saýda men ınvestıtsııa úshin iri platformaǵa, sondaı-aq Ortalyq Azııa halyqtary arasyndaǵy beıbitshiliktiń, senimniń jáne birliktiń sımvolyna aınala alatynyna senimdi.
Esterińizge sala keteıik, 2025 jyldyń 31 naýryzynda Qyrǵyzstan, Tájikstan jáne Ózbekstan prezıdentteri Sadyr Japarov, Emomalı Rahmon jáne Shavkat Mırzıeev Hýdjandta ótken kezdesýde úsh eldiń shekaralyq túıispe núktesi týraly kelisimge qol qoıǵan bolatyn. Shekaralyq túıispe núktesi Ferǵana alqabynda ornalasqan jáne Soǵdy (Tájikstan), Ferǵana (Ózbekstan) jáne Batken (Qyrǵyzstan) oblystaryn baılanystyrady.
