Qyrǵyzstan taýly óńirlerdiń klımat turaqtylyǵyn arttyrýǵa baǵyttalǵan bastama usyndy
ASTANA. KAZINFORM – Qyrǵyz Respýblıkasy taýly óńirlerdiń klımattyq turaqtylyǵyn arttyrýǵa baǵyttalǵan halyqaralyq bastama kóterdi. Bul týraly Qyrǵyz Respýblıkasy Mınıstrler Kabıneti janyndaǵy Klımattyq qarjylandyrý ortalyǵynyń dırektory Aıbek Asanov málim etti.
Onyń aıtýynsha, taýly óńirler jahandyq klımattyq júıede mańyzdy ról atqarady.
— Taýlar tek tabıǵı mura ǵana emes, sonymen qatar klımattyq júıeniń negizgi elementteriniń biri. Sondyqtan búginde olar júıeli sheshimder men halyqaralyq deńgeıde erekshe nazardy qajet etedi, — dedi ol.
Spıkerdiń dereginshe, taýly aımaqtar jer betiniń shamamen 27 paıyzyn alyp jatyr jáne álem halqynyń aıtarlyqtaı bóligin tuşy sýmen qamtamasyz etedi. Soǵan qaramastan, bul óńirler jahandyq klımattyq saıasat pen qarjylandyrý júıesine jetkilikti deńgeıde eskerilmegen.
— Osyǵan baılanysty qazirgi tańda tabıǵı apattardyń jıileýi men ekojúıelerdiń tozýy sııaqty klımattyq táýekelder kúsheıip otyr. Sondyqtan taýly óńirlerdiń turaqtylyǵyn arttyrýǵa baǵyttalǵan halyqaralyq deńgeıdegi tetikterdi damytý qajet, — dedi Aıbek Asanov.
Onyń aıtýynsha, usynylyp otyrǵan bastama birqatar mańyzdy mindetti qamtıdy. Atap aıtqanda, bastama jahandyq sheshimderdi ulttyq deńgeıde iske asyrýǵa, klımattyq qarjylandyrýǵa qoljetimdilikti arttyrýǵa jáne táýekelderdi júıeli túrde azaıtýǵa múmkindik beredi.
— Bul sharalar Parıj kelisiminiń maqsattaryn júzege asyrýǵa, ásirese klımattyq táýekelderge beıim elder úshin mańyzdy ról atqarady, — dedi ol.
Sondaı-aq ol halyqaralyq deńgeıdegi úılesimdi is-qımyldyń mańyzyn atap ótti.
— Osy turǵyda taýly óńirlerge qatysty kún tártibin jahandyq klımattyq saıasattyń mańyzdy bóligine aınaldyrý qajet. Bul baǵytta elderdi birlesken áreketke shaqyramyz, — dep túıindedi Aıbek Asanov.
Aıta keteıik, buǵan deıin Qyrǵyzstan óńirlik ekologııalyq qaýipsizdikti qamtamasyz etý maqsatynda Qazaqstanmen jáne ózge kórshiles eldermen yntymaqtastyqty kúsheıtýge daıyn ekenin málimdegen edi.
