Qyrǵyzstan taýarlardy qujatsyz ımporttaıtyndarǵa aıyppuldy kóbeıtti
BІShKEK. KAZINFORM – Qyrǵyzstan EAEO-ǵa múshe memleketter aýmaǵynan taýarlar men kólik quraldaryn qajetti qujattarsyz shekara arqyly ótkizgeni úshin aıyppuldardy kóbeıtti, dep habarlaıdy Kazinform agenttiginiń Bishkektegi menshikti tilshisi.
Memlekettik salyq qyzmetiniń málimetinshe, Qyrǵyzstan Respýblıkasynyń Quqyq buzýshylyq týraly kodeksine 2026 jyldyń 21 tamyzynan bastap kúshine enetin jańa ákimshilik aıyppuldardy kózdeıtin túzetýler engizildi.
Jazalaý somasy júktiń qunyna tikeleı baılanysty. Atap ótkende:
• 500 myń somnan (2,6 mln teńgeden astam) tómen baǵadaǵy taýarlar úshin jeke tulǵalar úshin 50 myń som (261 myń teńge), zańdy tulǵalar úshin – 100 myń som (522 myń teńge) aıyppul salynady;
• 500 myńnan 1 mln somǵa deıin: jeke tulǵalar úshin 100 myń som (522 myń teńge) jáne zańdy tulǵalar úshin 200 myń som (1 mln 44 myń teńge);
• 1 mıllıon somnan jáne odan joǵary: jeke tulǵalar úshin 200 myń som (1 mln 44 myń teńge) jáne zańdy tulǵalar úshin 300 myń som (1,56 mln teńge).
Quqyq buzýshylyq bir jyl ishinde qaıtalanǵan jaǵdaıda qarjylyq sanktsııalar artady, al kirgizilgen taýar tárkilenedi:
• Eger taýarlardyń quny 500 myń somnan (2,6 mln teńgeden astam) az bolsa, jeke tulǵalar úshin 70 myń som (365 400 teńge), al zańdy tulǵalar úshin 130 myń som (678 600 teńge) aıyppul salynady;
• 500 myńnan 1 mln somǵa deıin – jeke tulǵalar úshin 130 myń som (678 600 teńge) jáne zańdy tulǵalar úshin 250 myń som (1,3 mln teńge);
• 1 mln jáne odan da kóp — jeke tulǵalar úshin aıyppul 250 myń som (1,3 mln teńge) jáne zańdy tulǵalar úshin 350 myń som (1,82 mln teńge) bolady.
Osyǵan deıin Qyrǵyzstanda salyqtyq tirkeýi bolmaýyna baılanysty el azamattaryna elektrondyq qyzmet kórsetetin 11 sheteldik kompanııa servısiniń jumysy shektelýi múmkin ekenin jazdyq.
Qyrǵyzstan keıbir salalardaǵy kásipkerler úshin bes jyldyq salyq jeńildigin usyndy. Tıisti jarlyqqa el prezıdenti qol qoıdy.
