Qyrǵyzstan stýdentterine basqa óńirlerde bilim alǵany úshin qarjylaı qoldaý kórsetiledi
ASTANA. KAZINFORM — Qyrǵyzstanda stýdentterdiń óńiraralyq akademııalyq utqyrlyǵyn engizý josparlanyp otyr. Bul týraly Kazinform agenttiginiń Bishkektegi menshikti tilshisi habarlaıdy.
Qyrǵyzstannyń Ǵylym, joǵary bilim jáne ınnovatsııalar mınıstrligi 2026-2031 jyldarǵa arnalǵan stýdentterdiń basqa óńirlerde bilim alýyn qoldaý baǵdarlamasynyń jobasyn qoǵamdyq talqylaýǵa shyǵardy.
Qujatqa sáıkes, baǵdarlamaǵa qatysý úshin memlekettik bilim granttaryn bólý 2027-2028 oqý jylynan bastalady. Bul úshin bólinetin memlekettik granttardyń jalpy sanynyń 40 paıyzy qarastyrylmaq.
Stýdenttiń úlgerimine qaramastan, baǵdarlamaǵa qatysatyn ár stýdentke jylyna 43 myń som tólenedi. Onyń 25 myńy 10 aıǵa eseptelgen aı saıynǵy 2,5 myń som shákirtaqyǵa, 18 myńy el ishindegi tórt áýe reısiniń bıletine jumsalady. Ár reıske 4,5 myń somnan qarastyrylǵan.
2027-2031 jyldary óńirlerdegi stýdentterdi jataqhanamen qamtý máselesi de sheshimin tabady. Osy kezeńde 24 720 orynǵa arnalǵan stýdentter jataqhanasy salynyp, qoldanystaǵy nysandar jańartylady. Buǵan shamamen 25,6 mlrd somnan astam qarjy jumsalady. Qazir Qyrǵyzstandaǵy joǵary kásiptik bilim berý uıymdarynda 230 myńnan astam stýdent oqıdy. Olardyń nebári 10 paıyzy ǵana jataqhanamen qamtylǵan.
Baǵdarlama óńirlerdegi áleýmettik ınfraqurylymdy jaqsartyp, stýdentterge qolaıly mádenı, sporttyq jáne demalys ortasyn qalyptastyrýǵa yqpal etedi. Baǵdarlama bes jylǵa eseptelgen.
Buǵan deıin Qyrǵyzstanda oqýshylar men stýdentterdi teatr men mýzeıge barýǵa mindetteý usynylǵany habarlanǵan bolatyn.
Aqzat Jıenalına
