Qyrǵyzstan ІІM qazaqstandyq áriptesterine 50 tonna gýmanıtarlyq kómek jiberdi

ASTANA. KAZINFORM – Qyrǵyz Respýblıkasynyń Іshki ister mınıstrligi alapat sý tasqynymen kúresip jatqan Qazaqstan Respýblıkasyna 50 tonnadan astam gýmanıtarlyq kómek jiberdi.

Qyrǵyz Respýblıkasy ІІM habarlaýynsha, qazaqstandyq polıtseılerge jiberilgen gýmanıtarlyq júk qajetti zattar, dári-dármekter, rezeńke etik, dızeldi jáne elektr generatorlary, úrlemeli qaıyqtar, shatyrlar, matratstar, tamaq ónimderi, kórpe-jastyq, tósek-oryn túrinde jiberilgen.

– Bul bastama daǵdarys kezinde eki el arasyndaǵy yntymaqtastyqty qoldaýdyń bir bóligi boldy. Bizdiń Qazaqstanmen yntymaqtastyǵymyzdyń tarıhy áriden bastalady jáne mundaı sátterde bir-birimizge qoldaý kórsetý mańyzdy. Bul gýmanıtarlyq kómek tabıǵı apat saldarymen kúresip jatqandarǵa jeńildik ákelip, zardap shekken aımaqtardy qalpyna keltirýge kómektesedi dep úmittenemiz», - dep atap ótti vedomstvodan.

Esterińizge sala keteıik, 6 sáýirde Qyrǵyz Respýblıkasynyń Prezıdenti Sadyr Japarovtyń tapsyrmasymen Qazaqstannyń sý tasqynynan zardap shekken aımaqtary úshin Qyrǵyzstan baýyrlas Qazaqstanǵa 300 tonna gýmanıtarlyq júk tıelgen 15 júk kóligin jóneltken bolatyn. 14 sáýirde Qyrǵyzstanda óndirilgen 150 tonna sút ónimderinen turatyn «Járdem kerýeni» gýmanıtarlyq júginiń ekinshi partııasy jóneltildi.