Qyrǵyzstan sheteldikterge sýrrogat ana qyzmetin paıdalanýǵa tyıym salýy múmkin
ASTANA. KAZINFORM — Qyrǵyzstanda shetel azamattaryna jergilikti sýrrogat analardyń qyzmetin paıdalanýǵa tyıym salý usynyldy. Tıisti zań jobasy qoǵamdyq talqylaýǵa shyǵaryldy, dep habarlaıdy Kazinform agenttigi AKIpress-ke silteme jasap.
Zań jobasynyń bastamashylary — Jogorký Kenesh spıkeriniń orynbasary Bolot Ibragımov pen depýtat Chyńgyz Ajıbaev.
Avtorlardyń aıtýynsha, usynylyp otyrǵan ózgerister áıelder men balalardyń quqyqtary men densaýlyǵyn qorǵaýǵa, sýrrogat ana bolýdy kommertsııalandyrýdyń aldyn alýǵa jáne bul qyzmetti Qyrǵyzstan azamattarynyń paıdalanýyna quqyqtyq jaǵdaı jasaýǵa baǵyttalǵan. Bastamanyń taǵy bir sebebi retinde eldegi demografııalyq ahýaldyń nasharlaýy ataldy.
Qyrǵyzstanda sýrrogat ana qyzmeti 2005 jyldan beri qoldanysta. Zań jobasynyń avtorlary buqaralyq aqparat quraldaryna kelisimshartta kórsetilgen qarajattyń tólenbeýine jáne densaýlyǵynyń nasharlaýyna shaǵymdanǵan áıelderdiń júgingen jaǵdaılary bolǵanyn atap ótti. Bul rette derekterdiń qupııalylyǵyna baılanysty sýrrogat ana qyzmetin paıdalaný jaǵdaılaryna qatysty naqty statıstıka joq.
Usynylyp otyrǵan normaǵa sáıkes, Qyrǵyzstanda sýrrogat ana bolý týraly kelisimshartty tek Qyrǵyzstan azamattary jasaı alady. Sonymen qatar shetel azamatymen resmı nekede turǵan Qyrǵyzstan azamaty bul qyzmetti paıdalana alady.
Buǵan deıin Qazaqstan Prezıdenti «Neke (erli-zaıyptylyq) jáne otbasy týraly» kodekske ózgerister engizý týraly zańǵa qol qoıǵan bolatyn. Endi sýrrogat ana qyzmetine tapsyrys berýshiler tek nekede turǵan Qazaqstan azamattary bola alady.
