Qyrǵyzstan shekaradaǵy veterınarııalyq baqylaýdy rettemekshi
ASTANA.KAZINFORM - El úkimeti taýarlardy ımporttaý, eksporttaý, tranzıtteý jáne shekara arqyly tasymaldaý kezinde memlekettik veterınarııalyq baqylaýdy júzege asyrý tártibi týraly nusqaýlyq ázirledi, dep habarlaıdy Kazinform agenttiginiń Bishkektegi tilshisi.
Mınıstrler Kabıneti qaýlysynyń jobasy qoǵamdyq talqylaýǵa usynyldy.
Nusqaýlyq ulttyq veterınarııalyq rásimderdi halyqaralyq talaptarǵa sáıkestendirýge jáne biryńǵaı veterınarııalyq baqylaý rásimin belgileýge, sondaı-aq qaýipti janýarlar aýrýlaryn jáne qaýipsiz emes janýarlar ónimderin ımporttaý jáne taratý qaýpin azaıtýǵa baǵyttalǵan.
Qujatqa sáıkes, memlekettik shekaradan ımporttaý, eksporttaý jáne tranzıtteý kezinde retteletin júkterge qujattyq, fızıkalyq jáne zerthanalyq tekserýler qoldanylýy múmkin. Taýarlarǵa qatysty barlyq tranzaktsııalar «Sanarip VET» avtomattandyrylǵan aqparattyq júıesi arqyly óńdeledi.
Buǵan deıin Qyrǵyzstan qaýipti janýarlar aýrýlarynyń engizilýi men taralýynyń aldyn alý úshin mal men et ımportyna veterınarııalyq-sanıtarııalyq baqylaýdy kúsheıtkeni týraly habarlanǵan bolatyn.
Sondaı-aq, biz elde epızootııalyq baqylaýdy kúsheıtý jáne veterınarııa salasyn tsıfrlandyrý úshin «Іndettiń órshýin tirkeý jáne baqylaý júıesi» geografııalyq aqparattyq júıe ázirlengenin habarladyq.