Qyrǵyzstan sarapshylary apıyn kóknárin ósirýdi qoldady
Qyrǵyzstanda apıyn kóknárin óndirý jobasyn júzege asyrýdy qoldaıtyn bastamashyl top quryldy. Sarapshylar pikirinshe, shıkizatty ósirýdiń qaýipsizdigi men mehanıkalandyrylýyn qamtamasyz ete alatyn memlekettik mekeme qurý qajet. QazAqparat bul týraly 24.kg basylymyna silteme jasap habarlaıdy.
Reseı jaratylystaný ǵylymdary akademııasynyń akademıgi Murat Súıinbaevtyń atap ótýinshe, Reseı – Qyrǵyzstanda ósirilgen apıyn kóknárin satý úshin eń tıimdi naryq. Qundy shıkizatqa Majarstanda da suranys joǵary. Eki áleýetti seriktes te kóknár negizinde medıtsına preparattaryn óndirý boıynsha qýatty elder. Onymen bir mezgilde, sarapshynyń pikirinshe, «kóknár jobasyna» Túrkııa, Iran men Úndistan qoldaý bildire alar edi.
Murat Súıinbaev esirtki zattary týraly 1961 jylǵy Konventsııa aıasynda 5 tonnadan artyq apıyn kóknári BUU beretin kvota arqyly óndiriletinin aıtty.
«Qyrǵyzstannyń osyndaı kvota alý múmkindigi joǵary. Sebebi ekonomıkamyz damýshy, al elde teńizge shyǵar jol joq», - deıdi ol.
Bıohımık dáriger Baqyt Saıypbaev analgetık-dárilerdiń 50-den astam ataýyn óndirýge apıyn kóknári paıdalanylatynyn eske saldy. Oǵan qosa negizgi áleýetti seriktes – Reseıdiń soǵys pen halyqaralyq oqshaýlaý saldarynan bul shıkizatqa suranysy tipti artyp otyr.
Sarapshynyń pikirinshe, eldegi esirtki jaǵdaıy nasharlap kete me degen qaýiptiń negizi joq. Sebebi Qyrǵyzstanda esirtki tasymaly bar ekeni jasyryn emes, ony toqtatý úshin memleket tarapynan baqylaý kerek.
Saıasatker Baqyt Beketaev Qyrǵyzstan aýyl sharýashylyǵyn damytyp, marjınal ónimmen aınalysqany durys dep esepteıdi. Apıyn kóknári – eń tabysty sala. Sarapshy kóknár ósirý úshin 1 myń gektar jer bólinse, jylyna 2,5 mıllıard dollar tabys túsip otyratynyn atap ótti.
