Qyrǵyzstan Reseıge óz mıgranttarynyń máseleleri boıynsha nota berdi

ASTANA.KAZINFORM  - Qyrǵyzstan SІM Reseı zańnamasyndaǵy ózgerister jaǵdaıynda Reseıdegi qyrǵyzstandyqtardyń quqyqtyq jaǵdaıyn talqylady, dep habarlaıdy Kazinform agenttiginiń menshikti tilshisi.

19 aqpanda Bishkekte Qyrǵyzstan Syrtqy ister mınıstriniń orynbasary Almaz Imanǵazıev Reseıdiń Qyrǵyzstandaǵy elshisi Sergeı Vakýnovpen kezdesti.

Qyrǵyz tarapy sheteldik azamattardyń Reseı Federatsııasyna kirýiniń jańa erejeleri men sharttaryn engizýge, atap aıtqanda, elge kirý jáne elde bolýy úshin aldyn ala tirkeý jáne ótinish berý mehanızmine, sondaı-aq olardyń Reseıde ýaqytsha bolý merzimin azaıtýǵa baılanysty máselelerge nazar aýdardy, dep habarlaıdy qyrǵyzstandyq SІM.

Bul ózgerister Qyrǵyzstannyń eńbek azamattary men olardyń otbasy músheleriniń qozǵalys erkindigine, sondaı-aq olardyń Reseı Federatsııasyndaǵy eńbek qyzmetine qoljetimdiligine teris áser etýi múmkin ekendigi atalyp ótti.

Sondaı-aq, shetel azamattarynyń balalaryna, onyń ishinde Qyrǵyzstan azamattaryna Reseıdiń jalpy bilim berý uıymdaryna qabyldaý kezinde orys tilin bilýge arnalǵan testileýden ótýge jańa talaptardy engizýge erekshe nazar aýdaryldy.

- Qyrǵyz tarapy Reseı tarapynyń nazaryn Reseıge kirý kezindegi qyrǵyz azamattarynyń jalǵasyp jatqan qıyndyqtaryna jáne olardy Reseı Federatsııasyna kóshi-qon esebine qoıýdaǵy problemalarǵa aýdardy. Kezdesý sońynda Qyrǵyzstan men Reseıdiń Eýrazııalyq ekonomıkalyq Odaqqa músheligin, sondaı-aq Qyrǵyz Respýblıkasyndaǵy orys tiliniń mártebesin eskere otyryp, atalǵan máseleler boıynsha Qyrǵyzstan notalary Reseı tarapynyń qaraýyna berildi, - delingen habarlamada.

Buǵan deıin Qyrǵyzstan SІM azamattarǵa Reseıge kirgen kezde kúsheıtilgen baqylaýǵa daıyndalýǵa keńes bergeni habarlanǵan bolatyn.