Qyrǵyzstan — Reseıge frılans qyzmetin kórsetetin elderdiń úzdik ondyǵyna endi

ASTANA. KAZINFORM — Qyrǵyzstannan shyqqan qashyqtan jumys isteıtin mamandar Reseıdegi eńbek naryǵynda eń kóp suranysqa ıe frılanserler qataryna endi, dep jazady Kabar.

Bul týraly Solar Staff, TenChat jáne Búkilreseılik Bıznes Ortalyǵynyń birlesken zertteýine silteme jasaı otyryp RBK agenttigi habarlady.

2025 jyldyń alǵashqy jartyjyldyǵynda frılanserlerdiń ortasha aılyq tabysy 42 myń rýblge jetip, ótken jylmen salystyrǵanda 31,2%-ǵa artqan. Bul — qashyqtan jumys isteıtin mamandardyń ekonomıkadaǵy róliniń ósip kele jatqanyn kórsetedi.

Zertteý derekterine sáıkes, reseılik kompanııalardyń shamamen 70%-y kem degende bir ret frılanserlerdiń qyzmetine júgingen. Al árbir úshinshi kompanııa olardy turaqty negizde jumysqa tartyp otyrady. Eń joǵary tabysqa ıe frılanserler — veb-damytý mamandary (188 myń rýblden asady) jáne baǵdarlamashylar (shamamen 185 myń rýbl).

Qyrǵyzstanmen qatar, Belarýs, Qazaqstan, Armenııa, Grýzııa, Ózbekstan, Serbııa, Ispanııa jáne Moldova da reseılik bızneske belsendi túrde frılanserler usynatyn elderdiń qataryna kiredi.

Reseılik kompanııalar kóbine frılanserlerge IT-jobalaý, býhgalterlik esep, dızaın jáne marketıng salalaryndaǵy mindetterdi aýtsorsıng arqyly tapsyrady. Sarapshylardyń pikirinshe, bul tásil kompanııalarǵa negizgi shtatqa júktemeni arttyrmaı, naqty jobalardy tez ári tıimdi oryndaýǵa múmkindik beredi.

Buǵan deıin Qyrǵyzstanda jazda jáne kúzde shekara qyzmetkerleriniń jalaqysy ósetini habarlandy.