Qyrǵyzstan Reseıden keletin jolaýshylardy tekserýdi kúsheıtti
ASTANA. KAZINFORM — Qyrǵyzstan memlekettik shekara beketterinde aldyn alý sharalary men sanıtarlyq-karantındik baqylaýdy kúsheıtti, dep habarlaıdy Kazinform agenttiginiń Bishkektegi tilshisi.
Qyrǵyz Respýblıkasy Densaýlyq saqtaý mınıstrliginiń málimetinshe, bul sharalar Reseıdiń Irkýtsk qalasynda obaǵa qarsy kúres ınstıtýty qyzmetkeriniń etıologııasy belgisiz pnevmonııamen aýyrǵany týraly aqparattan keıin qabyldandy. Qyrǵyzstandaǵy barlyq sanıtarlyq-karantındik beketter kúsheıtilgen rejımde jumys istep jatyr, al jaǵdaıdy sanıtarlyq-epıdemıologııalyq qyzmet baqylaýda ustaýda.
— Sanıtarlyq-karantındik beketter juqpaly aýrýlardyń, sonyń ishinde asa qaýipti ınfektsııalardyń elge kirýi men taralýynyń aldyn alý maqsatynda memlekettik shekaradan kirip kele jatqan adamdardy, kólik quraldary men júkterdi sanıtarlyq-epıdemıologııalyq tekseristen ótkizip jatyr, — delingen habarlamada.
Buǵan deıin Obaǵa qarsy kúres ınstıtýty qyzmetkeri qaıtys bolǵannan keıin Rospotrebnadzor Irkýtsk oblysyndaǵy jáne Irkýtsk jáne Shelehov qalalaryndaǵy sanıtarlyq-epıdemıologııalyq jaǵdaıdy teksergen bolatyn.
QR Densaýlyq saqtaý mınıstrligi Irkýtsk oblysyndaǵy jaǵdaıdy baqylaýda ustap otyr.
