Qyrǵyzstan «Reketır 3» fılmin kórsetýge nege tyıym saldy – «Kyrgyztasmasy» jaýaby

ASTANA. KAZINFORM – «Kyrgyztasmasy» memlekettik kıno ortalyǵy «Reketır: Jańa ýaqyt» fılminiń prokattan alyný sebebin túsindirdi, dep habarlaıdy Kazinform agenttiginiń menshikti tilshisi.

Atalǵan ortalyq dırektory Talantbek Tolobekovtiń dereginshe, qazaqstandyq fılm «Balalardyń densaýlyǵyna, olardyń fızıkalyq, zııatkerlik, psıhologııalyq, rýhanı jáne adamgershilik damýyna zııan tıgizýdiń aldyn alý sharalary týraly» qyrǵyz zańy negizinde prokattan alynǵan. Óıtkeni, búginde qyrǵyz mektepterinde bopsalaýshylyq derekteri jıilep tur. Osy jaıtty qaperge alǵan ortalyq mamandary 2025 jyldyń 3 aqpanynda «Reketır: Jańa ýaqyt» fılmine berilgen №29 prokattaý kýáligin 21 aqpannan bastap qaıtaryp alý týraly sheshim qabyldaǵan. Tyıym Qyrǵyzstandaǵy barlyq kınoteatrǵa menshik nysanyna qaramastan qoldanylady. 

- Sońǵy ýaqytta ereges, kóshedegi buzaqylyq áreket saldarynan balalardyń ólimi jıilep ketti. Bul qalaı degende de qoǵamymyzǵa, mádenıet qaıratkerlerine mańyzdy belgi. Biz transformatsııalanyp, dástúrli qundylyqtarymyzǵa barynsha ilgerileýimiz qajet. Osynyń negizinde kıno ortalyq mamandary fılmniń prokattaý kýáligin qaıtaryp alý týraly sheshim qabyldady, - dep túsindiredi ol. 

Onyń atap ótýinshe, ortalyq prokattaý kýálikterin jıi qaıtaryp alady. Bul festıvalderde kórsetilýge usynylǵan, sonymen qatar prokatqa shyqqan fılmderde tyıym salynǵan dúnıeler óte kóp bolǵan jaǵdaıda qoldanylady.

- Ózderińiz biletindeı, ótken jyly taǵy bir qazaqstandyq týyndy – «Dástúr» fılmine berilgen ruqsat qaıtaryp alyndy. Onda da tyıym salynǵan dúnıe kóp boldy. Qazir urpaqtyń bolashaǵyn, ósip kele jatqan jastardyń úlken ekrannan qundylyqtar jaıly durys túsinik alǵanyn oılaý mańyzdy. Bul trılogııa bolǵandyqtan mánmátini qıylyp qalýy jáne durys berilmeýi múmkin. Fılm jas urpaqty teris qylyqqa ıtermeleýi yqtımal, - dedi Talantbek Tolobekov.

Onyń aıtýynsha, Qyrǵyzstanda uıymdasqan qylmyspen kúres belsendi túrde júrgizilip jatyr. Osyǵan baılanysty Qazaqstan kınematografısteri qyrǵyz tarapyna renjimeýi kerek.

- Uıymdasqan qylmyspen kúres barlyq baǵytta júrgizilip jatyr. Túsinistik tanytý qajet. Biz Qazaqstan rejısseri Aqan Sataevty jaqsy kóremiz ári baǵalaımyz. Ony Qazaqstannyń talantty kınorejısserleriniń biri sanaımyz. 2023 jyly qyrǵyz prokatynda Qazaqstan fılmi bolmaǵanyn atap ótkim keledi. Al 2024 jyly kıno ortalyqtyń bastamasymen Qazaqstannyń 9 týyndysy shyqsa, osy jyldyń basynan kórermen nazaryna 3 fılm usynyldy. Qyrǵyzstanda aı saıyn Qazaqstan fılmderiniń tusaýkeseri ótedi. Kórsetilimge múldem tyıym salynbaıdy, biz yqpaldastyqty qoldaımyz. Qyrǵyz fılmderiniń Qazaqstan naryǵynda tabysqa jetip jatqany qýantady. Bul jerde de kórermen Qazaqstan týyndylaryn jyly qabyldaıdy. Qyrǵyz ben qazaq kınosynyń gúldenýi bir ýaqytqa saı keledi. Bizdiń tarlandarymyz ben klassıkterimiz birge jumys istedi. Eki eldiń yqpaldastyq protsesi munan ary da damı túsedi dep oılaımyn, - dedi kıno ortalyq dırektory.

Eske salsaq Qazaqstan qalalarynda kınoǵa bılet qansha turatyny týraly jazǵan edik.