Qyrǵyzstan iri qara, jylqy, qoı men eshkini elden shyǵarýǵa tyıym saldy
ASTANA. KAZINFORM — Qyrǵyz Respýblıkasy aýmaǵynan aýyl sharýashylyǵy janýarlaryn shetelge shyǵarýǵa alty aı merzimge ýaqytsha shekteý qoıyldy, dep habarlaıdy Kabar.
Tıisti qaýlyǵa mınıstrler kabınetiniń tóraǵasy Adylbek Kasymalıev qol qoıdy.
Bul sheshim eldegi azyq-túlik qaýipsizdigin qamtamasyz etý jáne naryqtaǵy baǵany turaqtandyrý maqsatynda qabyldanǵan.
Tyıym EAEO syrtqy ekonomıkalyq qyzmettiń taýar nomenklatýrasyna (TN VED) sáıkes keletin myna kodtarmen belgilengen janýarlarǵa qatysty:
-
Іri qara mal – kod 0102
-
Jylqy – kod 0101
-
Qoı men eshki – kod 0104
Alaıda bul tyıym kelesi jaǵdaılarǵa qoldanylmaıdy:
-
Qyrǵyzstan aýmaǵy arqyly tranzıttik tasymaldaý;
-
Sporttyq jarystarǵa qatysý úshin shyǵarylatyn jylqylar;
-
Shetel memleketterine, halyqaralyq uıymdarǵa nemese jeke tulǵalarǵa syıǵa beriletin jylqylar.
Ekonomıka jáne kommertsııa mınıstrligine, Syrtqy ister mınıstrligine, Memlekettik keden qyzmetine, Aýyl sharýashylyǵy, sý resýrstary jáne óńdeý ónerkásibi mınıstrligine, sondaı-aq Ulttyq qaýipsizdik memlekettik komıtetiniń Shekara qyzmetine – aýyl sharýashylyǵy janýarlaryn zańsyz eksporttaýdyń aldyn alý boıynsha qajetti sharalar qabyldaý tapsyryldy.
Qaýly resmı jarııalanǵan kúnnen bastap kúshine enedi.
Budan buryn habarlanǵandaı, Qyrǵyzstanda et baǵasynyń ósýine jol bermeý maqsatynda qabyldanǵan bılik sharalarynyń nátıjesinde mal eksporty eki eseden astam azaıdy.