Qyrǵyzstan iri ınvestorlar úshin jaǵdaıdy jeńildetip jatyr

ASTANA. KAZINFORM — Elde tikeleı sheteldik ınvestıtsııalardy tartý maqsatynda iri bıznesti yntalandyrý sharalary júzege asyrylyp jatyr, dep habarlaıdy Kazinform agenttiginiń Qyrǵyzstandaǵy menshikti tilshisi.

Qyrǵyz Respýblıkasynyń Ulttyq ınvestıtsııalar agenttiginde atap ótkendeı, «QR-daǵy ınvestıtsııalar týraly» zańnyń erejelerine sáıkes ınvestorlarǵa Qyrǵyz Respýblıkasynyń Mınıstrler kabınetimen tikeleı jeke ınvestıtsııalyq kelisim jasasý múmkindigi berilgen.

Agenttiktiń málimetinshe, atalǵan norma keminde 10 mln AQSh dollaryn salýǵa daıyn, halyqaralyq iskerlik bedeli bar, biregeı bilimderi men tabysty ınvestıtsııalyq jobalardy júzege asyrý tájirıbesi bar ınvestorlarǵa qoldanylady.

Investıtsııalyq kelisim aıasynda ınvestorlarǵa tómendegideı múmkindikter usynylýy múmkin:

salyqtyq jáne kedendik jeńildikter men preferentsııalar;

negizgi qyzmetkerler úshin vızalyq qoldaý;

jobalardy iske asyrýǵa arnalǵan jer telimderin tańdaýǵa jáne rásimdeýge járdemdesý.

Ulttyq ınvestıtsııalar agenttigi halyqaralyq jáne jergilikti ınvestorlardy yntymaqtastyqqa shaqyryp, ınvestıtsııalyq bastamalardy ótinim berýden bastap jobany iske asyrýǵa deıin tolyq qoldaýǵa daıyn ekenin málimdedi.

Buǵan deıin Qyrǵyzstanda ortasha aılyq jalaqy 42 myń somnan asqany týraly jazǵan edik.