Qyrǵyzstan Prezıdenti strategııalyq mańyzy bar ulttyq jobalar týraly jarlyqqa ózgerister engizdi
BІShKEK. KAZINFORM – Qyrǵyzstan Prezıdenti Sadyr Japarov «Іske asyrýy el úshin strategııalyq mańyzy bar ulttyq jobalar týraly» Prezıdent Jarlyǵyna ózgerister engizý týraly» Jarlyqqa qol qoıdy. Bul týraly Kazinform Kabar agenttigine silteme jasap habarlaıdy.
Qujatta memlekettik basqarý nemese ekonomıkany damytý salasyna arnalǵan memlekettik bıýdjetten tolyq nemese ishinara qarjylandyrylatyn, sondaı-aq memlekettik aktıvterdi salym retinde berý jolymen strategııalyq ınfraqurylym obektilerin salýǵa baǵyttalǵan ınvestıtsııalyq jobalardy qoldaý maqsatynda Qyrǵyz Respýblıkasy Konstıtýtsııasynyń 70, 71-baptaryna sáıkes qaýly etiletini jazylǵan.
1. «Іske asyrylýy el úshin strategııalyq mańyzy bar ulttyq jobalar týraly» Qyrǵyz Respýblıkasy Prezıdentiniń 2023 jylǵy 23 naýryzdaǵy № 63 Jarlyǵyna mynadaı ózgerister engizilsin:
1) 1-tarmaqtyń besinshi abzatsy mynadaı redaktsııada jazylsyn:
«memlekettik mańyzy bar jobalar – memlekettik basqarý nemese ekonomıkalyq damý salasyna arnalǵan memlekettik bıýdjetten tolyq nemese ishinara qarjylandyrylatyn, sondaı-aq memlekettik aktıvterdi ınvestıtsııa retinde usyný jolymen strategııalyq ınfraqurylym obektilerin salýǵa baǵyttalǵan jobalar.»;
2) 2-tarmaq mynadaı redaktsııada jazylsyn:
«2. Memlekettik organdar ulttyq ınvestıtsııalyq jobalardy jáne memlekettik mańyzy bar jobalardy iske asyrý úshin kepildikke, ınfraqurylymdyq, fıskaldyq, ákimshilik qoldaýǵa, óńirlik jobalar úshin jeńildikti sharttarǵa negizdelgen memlekettik qoldaýdyń keshendi ádisin paıdalanady.
3) 4-tarmaqtaǵy «memlekettik ınvestıtsııalardyń jobalaryna» degen sózder «memlekettik mańyzy bar jobalarǵa» degen sózdermen aýystyrylsyn.
Qyrǵyz Respýblıkasynyń Mınıstrler Kabıneti úsh aı merzimde óz sheshimderin osy Jarlyqqa sáıkes keltirsin.
Osy jarlyq resmı jarııalanǵannan keıin on kún ótken soń kúshine enedi.
