Qyrǵyzstan prezıdenti sońǵy kadrlyq sheshimder neden týyndaǵanyn túsindirdi
BІShKEK. KAZINFORM – Qyrǵyzstan prezıdenti Sadyr Japarov nelikten Kamchybek Tashıevti vıtse-premer-mınıstr jáne Ulttyq qaýipsizdik memlekettik komıteti (UQMK) tóraǵasy qyzmetinen bosatý týraly sheshim qabyldaǵanyn baıandady, dep habarlaıdy Kazinform.
Sadyr Japarov Kabar agenttigine bergen suhbatynda túsindirgendeı, ol dosy Kamchybek Tashıevti qorǵaý úshin ýaqtyly jáne jedel sheshim qabyldady.
- Óıtkeni onyń aınalasyndaǵylar, meniń dosymdy týra joldan adastyryp júrdi. Olar Kamchybek Tashıevtiń atyn jamylyp, parlament depýtattaryna, joǵary laýazymdy qyzmetkerlerge jáne qoǵamda tanymal tulǵalarǵa «General jaǵyna ótińder» dep úndeý tastaı bastady, - dep túsindirdi ol.
Qyrǵyz kóshbasshysynyń aıtýynsha, bul memlekettik apparat pen qoǵam arasynda kelispeýshilikke ákelýi múmkin edi.
- Sondyqtan men dosymdy qyzmetinen bosatý týraly sheshim qabyldaýǵa májbúr boldym. Memlekettegi turaqtylyq men úshin eń joǵary, - dep atap ótti ol.
Qyrǵyzstan prezıdenti Kamchybek Tashıevti qyzmetinen bosatý kezinde oǵan aldyn ala habarlasyp, jaǵdaıdy túsindirgenin málimdedi.
Onyń aıtýynsha, bul sheshim memleket pen halyqtyń tynyshtyǵy men birligi úshin qabyldandy. Ol sondaı-aq dostyqty laýazymmen nemese kez kelgen múddemen baılanystyrý durys emes ekenin atap ótip, Tashıevpen dostyq qarym-qatynasy saqtalatynyn qosyp ótti.
Japarov sonymen qatar UQMK reformalaý máselesine qatysty túsinik berip, organ ózine júktelgen tapsyrmany tolyq oryndaǵanyn atap ótti.
- Memleket – tiri organızm, ol únemi damyp, ózgerýi tıis. Eger keshe ulttyq qaýipsizdik aldynda bir qıyndyqtar bolsa, búginde olar múldem basqa. Osy shyndyqtardy eskere otyryp, UQMK-de qazirgi zamanǵy qaýipter men jahandyq ózgeristerge tótep beretin keshendi reforma júrgiziledi. Álem ózgerip jatyr, jáne bizdiń memlekettik ınstıtýttarymyz soǵan sáıkes alǵa jyljyp, jańartylýy tıis, - dedi ol.
Qyrǵyzstan basshysy sonymen qatar kadrlyq taǵaıyndaýlarda eshqandaı bóliný joq ekenin jáne árbir taǵaıyndaý muqııat tekserilip jatqanyn qosyp ótti.
- Zań árqashan kúshinde boldy jáne óz kúshinde qala beredi. Eshbir memlekettik qyzmetkerge zańdy buzýǵa nemese jeke múddesi úshin qandaı da bir áreket jasaýǵa ruqsat etilmeıdi. Eger arnaıy qyzmettiń nemese basqa memlekettik organnyń jekelegen ókilderiniń zańdy buzyp, óz ókilettikterin asyra paıdalanǵany anyqtalsa, olar mindetti túrde tergelip, jaýapqa tartylady. Zań aldynda bárimiz birdeımiz, - dep málimdedi Japarov.
Osyǵan deıin Qyrǵyzstannyń UQMK basshylyq quramynda aýys-túıis bolǵanyn habarladyq. https://kaz.inform.kz/news/kirgizstannin-ukmk-basshilik-kuraminda-auis-tuys-boldi-295516/
Sondaı-aq Qyrǵyzstanda Prezıdent janynan Memlekettik kúzet qyzmeti qurylyp, Shekara qyzmeti UQMK quramynan shyǵarylyp, Qyrǵyz Respýblıkasynyń Memlekettik shekara qyzmeti retinde derbes qurylymǵa aınaldy.