Qyrǵyzstan prezıdenti parlament saılaýyn óz baqylaýyna almaq

ASTANA.KAZINFORM – Qyrǵyzstan bıligi el tarıhynda ashyq ári ádil saılaý ótkizýge bar jaǵdaıdy jasady. Bul týraly el prezıdenti Sadyr Japarov halyqqa Joldaýynda aıtty, dep habarlaıdy Kazinform agenttiginiń menshikti tilshisi.

Qyrǵyzstan prezıdenti parlament saılaýyn jeke ózi baqylaýǵa nıetti.

Qyrǵyzstan basshysy 25 qyrkúıekte parlament ózin-ózi taratý týraly sheshim qabyldaǵanyn, al 30 qyrkúıekte VIII shaqyrylǵan Jogorký Keneshtiń (Parlament) saılaýyn 2025 jylǵy 30 qarashaǵa belgileý týraly jarlyqqa qol qoıylǵanyn atap ótti.

Sadyr Japarov saılaýshylar aldynda sóılegen sózinde halyqty ádil daýys berýge shaqyrdy.

- Sońǵy 30 jylda ártúrli depýtattardy kórdińizder, jaqsy da, jaman da, popýlıster de, demagogtar da, daýys kótergender de, sheshender de, baılar da, kedeıler de, daýysty satyp alýshylar men satýshylar da boldy. Aldaǵy saılaýda tek laıyqty depýtattarǵa daýys berýlerińizdi suraımyn. Biz, úkimet, saılaýlaryńyzdy ádil ótkizý úshin barlyq jaǵdaıdy jasadyq. Bul joly naǵyz halyq qalaýlylaryn – óz ókilderińizdi saılańyzdar, - dedi ol.

Qyrǵyz Respýblıkasynyń Prezıdenti aldaǵy parlamenttik saılaýdy basynan aıaǵyna deıin tóreshi retinde jeke ózi qadaǵalaıtynyn málimdedi.

-Eger qandaı da bir okrýgte ádiletsiz áreketter anyqtalsa, men Ortalyq saılaý komıssııasynyń tekserýine jeke qatysamyn nemese komıssııa quryp, sol jerge ózimniń senimdi ókilderimdi jiberemin. Árbir is ádil qaralady. Damyǵan elder sııaqty órkenıet bıigine umtylaıyq. Ekonomıkany, qorǵanysty, qaýipsizdikti nyǵaıtaıyq. Halyq tańdaǵan kandıdat jeńýi kerek. Biz halyq saılaǵan depýtattarmen jumys isteýge daıynbyz, - dedi Qyrǵyz Respýblıkasynyń basshysy.

Esterińizge sala keteıik, qyrkúıek aıynyń basynda Qyrǵyzstan Respýblıkasy Jogorký Keneshi (parlament) depýtattarynyń bastamashyl toby parlamentti taratýǵa, sodan keıin merziminen buryn saılaý ótkizýge shaqyrǵan bolatyn.

Qyrkúıektiń 23-i kúni Joǵarǵy Keńestiń Konstıtýtsııalyq zańnama, memlekettik qurylym, sot-quqyqtyq máseleler jáne Reglament komıteti 7-shi shaqyrylymdy taratý týraly usynysty maquldady.

Buǵan deıin Qyrǵyzstanda parlamentti taratý máselesi nege kóterilgeni týraly jazǵan edik.