Qyrǵyzstan prezıdenti nıkab pen paranja kııýge qatysty pikir bildirdi

ASTANA. KAZINFORM – Qyrǵyzstan prezıdenti Sadyr Japarov «Kabar» agenttigine bergen suhbatynda betti tolyq jabatyn kıimdi kııýge tyıym salý máselesi jóninde pikir bildirdi.

Memleket basshysynyń aıtýynsha, jaqynda elde din salasyn retteıtin zań qabyldanǵan. Soǵan sáıkes, dinge senýshilerdiń quqyqtaryna qatysty barlyq másele mýftııat pen ǵulamalar keńesine tapsyrylǵan. Bılik dinı máselelerge aralasa almaıdy. Mýftııat Quran men hadısterge súıene otyryp, dinı bilimge negizdelgen pátýalar shyǵarady, al bul pátýalardy el aýmaǵynda mindetti túrde oryndaý qajet.

Sadyr Japarov áıelderdiń hıdjab, nıkab jáne paranja kııý máselesine qatysty óz pikirin bildirdi:

— «Hıdjab» sózi qyrǵyz tilinde jaı ǵana «jaýlyq» degendi bildiredi. Jaýlyq — ejelden kele jatqan analarymyzdyń, ápke-qaryndastarymyzdyń dástúrli bas kıimi. Áıel ony qalaı taqsa da — bul onyń jeke isi. Orap taǵa ma, ıegi astynan baılaı ma — bastysy, beti ashyq bolýy kerek. Nıkab — kózden basqa jerdiń bárin jabatyn bas kıim. Al paranja — betti tolyqtaı jabady. Olardy kııýge mýftııat sheshimimen tyıym salynǵan. Azamattarymyz mýftııattyń pátýasyn oryndaýǵa mindetti. Bizdiń dástúrimizde áıelder eshqashan paranja kımegen, sondyqtan bul máseleni daýǵa aınaldyrýdyń qajeti joq, — dedi prezıdent.

Sadyr Japarovtyń pikirinshe, quqyq qorǵaý organdary beti ashyq áıelderdi (ıaǵnı jaı jaýlyq taqqandardy) toqtatpaýy kerek.

— Betti tolyqtaı jaýyp turatyn nıkab pen paranjaǵa kelsek, biz bul máselede qoǵamdyq qaýipsizdikti qamtamasyz etýge basa mán berýimiz kerek. Bul — bıliktiń bastamasy emes, Qyrǵyzstan musylmandary úshin mýftııat bekitken ereje. Memleket bul máselege beıjaı qaramaýy kerek, kerisinshe, osy erejelerdiń oryndalýyna kómektesýi tıis. Jalpy, barlyq máselede mýftııattyń pátýalaryn oryndaýǵa qoldaý kórsetýimiz kerek, — dedi qyrǵyz kóshbasshysy.

Eske salaıyq, Qyrǵyzstanda bıyl qańtar aıynda qabyldanǵan zańnamalyq ózgeristerge sáıkes, memlekettik mekemelerde jáne qoǵamdyq oryndarda adamnyń júzin tanýǵa múmkindik bermeıtin kıimdi kıgen azamattarǵa 20 myń som (117 600 teńge) kóleminde aıyppul salynady.

Qyrǵyzstanda aq qalpaq jáne ulttyq kıim kúni atalyp ótti.