Qyrǵyzstan prezıdenti kúsh-qýat qurylymdaryn bızneske qysym jasaýdy toqtatýǵa shaqyrdy

 ASTANA. KAZINFORM – Qyrǵyzstan prezıdenti Sadyr Japarov respýblıkalyq keńes barysynda quqyq qorǵaý organdary men kúsh-qýat qurylymdarynan adal kásipkerlerge negizsiz tekserý men qysym kórsetýdi toqtatýdy talap etti, dep habarlaıdy Kazinform agenttiginiń Bishkektegi menshikti tilshisi.

Qyrǵyzstan prezıdenti eldiń ishki jáne syrtqy ınvestorlar úshin ashyq ekenin atap ótti.

Onyń aıtýynsha, qolaıly ınvestıtsııalyq ahýal qalyptastyrý jaǵdaıynda bızneske negizsiz qysym kórsetýge jol berilmeıdi.

— Memlekettiń damýyna úles qosyp otyrǵan adal bıznes jan-jaqty qorǵalýy tıis. Kásipker qorqynysh pen qysym jaǵdaıynda jumys istegen jerde ekonomıkalyq ósim bolmaıdy. Bul memleket pen halyqqa zııan keltiredi. Osyǵan baılanysty quqyq qorǵaý organdary jergilikti bılik ókilderin, ákimderdi, kásipkerlerdi negizsiz tekserýdi toqtatýy kerek. Olardyń jumysyna aralasýdy, esep talap etýdi, artyq baqylaý júrgizýdi jáne negizsiz kabınetterge shaqyrýdy doǵaryńdar, — dep talap etti Sadyr Japarov.

Prezıdent jergilikti ózin-ózi basqarý organdarynyń basshylaryna qarata urlyq-qarlyq pen sybaılas jemqorlyqqa jol bermeı, ashyq ári adal jumys isteýge shaqyryp, jaýapkershilik bar ekenin eskertti.

Osyǵan deıin Qyrǵyzstan bıligi Tergeý komıtetin qurýdy josparlap otyrǵany týraly jazdyq.