Qyrǵyzstan prezıdenti: Endi tóńkeris bolmaıdy, memleket kúsheıdi

ASTANA. KAZINFORM – Qyrǵyzstan prezıdenti Sadyr Japarov halyqqa joldaýynda eldegi turaqtylyqty shaıqaltpaq bolǵan kez kelgen áreket sátsiz aıaqtalatynyn aıtty, dep habarlaıdy Kabar.

Memleket basshysy málimdegendeı, burynǵy jemqorlyq shemalary joıylǵan soń tabys kózinen aıyrylǵan keıbir toptar blogerler men arandatýshylar arqyly qoǵamǵa jalǵan aqparat taratyp, halyq arasynda narazylyq týdyrýǵa tyrysýda.

«Olar kimder? Olardyń arasynda iri korrýptsııalyq ister boıynsha ustalyp, sot sheshimimen memleketke qarjy men múlik qaıtarǵandar bar. Sondaı-aq kóleńkeli tabys júıesin joǵaltqan, qyzmetinen ketken soń ashý-yzamen kek alǵysy keletinder bar. ıAǵnı jeke múddesi úshin renjigen adamdar», — dedi Sadyr Japarov.

Prezıdenttiń aıtýynsha, keıbir blogerler memleket birtindep sheship kele jatqan máselelerdi qaıta kóterip, halyqty adastyrýda.

«Blogerler arqyly „KG Group“, „Ihsan“ sııaqty alaıaq kompanııalar salǵan turǵyn úıler týraly eski taqyryptardy qozdyryp, olardy sapasyz etip kórsetýge tyrysyp jatyr. Biz bul úılerdi zańdastyryp, elektr júıesine qosyp, kezeń-kezeńimen aıaqtaımyz. Qalǵan máselelerdi sheshý úshin ýaqyt kerek. Sondyqtan elde beıbereket bolady dep úmittenbeńizder, tóńkeris bolmaıdy», — dedi memleket basshysy.

Sadyr Japarov qazirgi Qyrǵyzstan burynǵy álsiz memleket emes ekenin erekshe atap ótti.

«Birinshiden, biz endi tóńkeris jasaýǵa sebep bermeımiz. Ekinshiden, memleket álsiz emes, qazir ol kúshti memleketke aınaldy. Úshinshiden, halyq kimge sený kerektigin jáne kim bılikte bolýy tıis ekenin jaqsy biledi. Budan bylaı tóńkeristerdi tek túsińizde ǵana kóresizder. Tonaý, basbuzarlyq, bılik úshin ashkózdik pen baılyqqa umtylý endi ótkenniń isi bolyp qalsyn», — dedi Prezıdent.

Aıta keteıik, Qyrǵyzstanda Jogorký Kenesh depýtattaryn merziminen buryn saılaý 2025 jylǵy 30 qarashada ótedi. Sadyr Japarov bul saılaýdyń ádil ótýin jeke baqylaýyna alatynyn málimdegen. Kandıdattardy tirkeý kezeńi aıaqtaldy.