Qyrǵyzstan prezıdenti ekinshi merzimge saılaýǵa túsýge nıetti
ASTANA. KAZINFORM — Sadyr Japarov 2027 jylǵy prezıdent saılaýyna túsý nıetin resmı túrde rastady, dep habarlaıdy Kazinform agenttiginiń Bishkektegi menshikti tilshisi.
Qyrǵyzstan basshysy bul týraly jýrnalıst Álı Toktakýnovqa bergen eksklıýzıvti suhbatynda málimdedi.
— Men taǵy bir merzimge saılaýǵa túsemin, — dedi Qyrǵyzstan basshysy saıası bolashaǵy týraly suraqqa jaýap bere otyryp.
Sadyr Japarov barlyq múddeli kandıdattar úshin jol ashyq ekenin jáne eshqandaı shekteý bolmaıtynyn atap ótti. Ol sondaı-aq saılaý protsesi kezinde memlekettik qyzmetkerlerge ákimshilik qysymnyń tolyǵymen joıylatynyna kepildik berdi.
— Kim saılaýǵa barǵysy kelse — barsyn. Biz eshkimdi shektemeımiz. Saılaý ashyq jáne zańǵa sáıkes ótedi, — dedi ol.
Osyǵan deıin Qyrǵyzstanda prezıdent saılaýy 2027 jyly ótetinin habarladyq.
2026 jyldyń shilde aıynda Qyrǵyzstanda prezıdent jáne parlament saılaýyn ótkizý erejesi ózgerdi.
