Qyrǵyzstan prezıdenti 20 mln dollarlyq múlkin zańdastyrdy

BІShKEK. KAZINFORM – Qyrǵyzstan prezıdenti Sadyr Japarov 20 mıllıon dollar turatyn múlkin zańdastyrǵanyn habarlady. Bul týraly ol áleýmettik jelidegi paraqshasynda jazdy.

«Meniń múlkimniń quny shamamen 20 mıllıon dollardy quraıdy. Zańdastyrý úshin memleketke mıllıon qyrǵyz sýmyn (≈11,2 myń dollar) tóledim. Bul zań boıynsha talap etiledi. Meniń shetelde jınaǵan aqsham joq. Bar bolsa, men olardy bizdiń bankterde saqtar edim», – dep jazdy Japarov.

Ol kiristerdi zańdastyrý týraly zań 2023 jyly qabyldanǵanyn eske saldy. Bul qyrǵyz baılary óz kapıtalyn shetelde ustamaı, óz eline ákelýi úshin jasalǵan.

«Jasyratyny joq, bárimiz (qarapaıym azamattar emes, orta bıznes deńgeıinen joǵary kásipkerler) óz múlkimizdi bireýdiń atyna rásimdep alǵanbyz. Oǵan qosa, elimizdiń aýqatty azamattary áli kúnge deıin mıllıardtaǵan aqshasyn sheteldik bankterde saqtaýda. Bizde mundaı baılar kóp. "Nelikten baılyǵyn shetelge jasyrady?" degen suraqtyń jaýaby qarapaıym. Osy ýaqytqa deıin qyrýar qarjynyń qaıdan alynǵany men osy qarajattan tólenetin salyq kólemine qatysty kóptegen suraqtar týyndady. Endi mundaı másele týyndamas úshin bul aktıvterdi zańdastyrýǵa múmkindik jasap jatyrmyz», – dep túsindirdi Japarov.

Ol bul múmkindikti 2024 jyldyń 1 shildesine deıin ǵana paıdalanýǵa bolatynyn aıtty. Memleket zańdastyrylǵan kapıtaldyń saqtalýyna 100 paıyz kepildik beredi.

«Meniń ǵımarattarym buryn basqa adamdardyń atyna rásimdelgen bolatyn. Qazir men olardy «Jarııalandyrý» zańy boıynsha óz atyma tirkedim. Men ózgeler úshin úlgi bolǵym keldi jáne birinshi bolyp múlkimdi zańdastyrdym», – dep jazdy prezıdent.