Qyrǵyzstan Parlamentiniń tóraǵasy QR Prezıdenti Teleradıokesheninde boldy
ASTANA. KAZINFORM – Qazaqstanǵa resmı sapary aıasynda Qyrǵyz Respýblıkasy Jogorký Keneshiniń tóraǵasy Nýrlanbek Týrgýnbek ýýlý Qazaqstan Respýblıkasy Prezıdentiniń Teleradıokeshenine keldi.
Jogorký Kenesh spıkeri medıa qurylymnyń qyzmetimen tanysyp, Jibek Joly telearnasynyń stýdııasyn aralady. Teleradıokeshenniń negizgi jumys baǵyttary týraly aqparat berildi. Sondaı-aq Silk Way Central Asia halyqaralyq medıajobasy tanystyryldy.
Bul jobanyń maqsaty – Ortalyq Azııada biryńǵaı aqparattyq keńistik qalyptastyrý jáne óńir elderiniń múddelerin jahandyq medıa alańynda ilgeriletý.
Silk Way telearnasy alty tilde habar taratady: qazaq, qyrǵyz, orys, aǵylshyn, ózbek jáne túrik tilderinde. Sonymen qatar, kontent tájik jáne túrikmen aýdıtorııasyna beıimdeledi. Habar taratý geografııasy tórt qurlyqtaǵy 120 eldi qamtyp, 300 mln astam áleýetti kórermendi qamtıdy.
Joba aıasynda New Time degen ataýmen Ortalyq Azııadaǵy mańyzdy oqıǵalarǵa aptalyq sholý, sondaı-aq Success Stories of Central Asian Women – aımaqtaǵy tabysty áıelder týraly telehıkaıalar sııaqty baǵdarlamalar aǵylshyn tilinde shyǵyp jatyr.
Aldaǵy ýaqytta Qyrǵyzstan, Ózbekstan, Túrikmenstan jáne Tájikstannyń ulttyq telekompanııalarymen kontent almasý jáne seriktestikti nyǵaıtý kózdelip otyr.
Aıta ketsek, buǵan deıin Vetnam aqparat agenttiginiń (VNA) bas dırektory Vý Vet Trang bastaǵan delegatsııasy QR Prezıdenti Teleradıokesheniniń keńsesinde bolyp qaıtty.