Qyrǵyzstan parlamentiniń beıindi komıteti el týyn ózgertý týraly zań jobasyn maquldady
Qyrǵyzstanda Jogorký Keneshtiń Konstıtýtsııalyq zańnama, memlekettik qurylym, sot-quqyqtyq máseleler jáne reglament jónindegi komıteti «Qyrǵyz Respýblıkasynyń memlekettik rámizderi týraly» Qyrǵyz Respýblıkasynyń zańyna ózgerister engizý týraly» zań jobasyn birinshi oqylymda maquldady, dep habarlaıdy Kazinform agenttiginiń menshikti tilshisi.
Qyrǵyz Respýblıkasynyń memlekettik sımvolyna ózgeris engizý týraly usynys tastaǵan – spıker Nýrlanbek Shakıev pen depýtat Ýlan Prımov. Olardyń sózinshe, qazir týdyń ortasyndaǵy kún sáýlesi men túndik túrlishe qabyldanady. Bireýler ony kúnbaǵysqa uqsatsa, endi biri kıiz úı bóligi retinde kóredi.
Depýtat Ýlan Prımov áriptesterinen zań jobasynyń tujyrymdamasyn qoldaýdy surap, memlekettik rámizderge ózgerister engizetin jalǵyz el Qyrǵyzstan emes ekenin atap ótti. Onyń aıtýynsha, tý beınelengen barlyq qajetti qujattarǵa ózgertýler birden engizýdiń qajeti joq, olardy kezeń-kezeńimen engizýge bolady.
Qyrǵyz Respýblıkasynyń týyndaǵy kún sáýlesiniń jańa nobaıyn jasaý úshin osy týdy bastapqy kezeńde jasaýshy avtorlar jumyldyryldy. Olar matematıkalyq esepteý, syzbalar jáne soǵan baılanysty jumystar júrgizdi. Avtorlardyń biri Júsip Mataevtiń atap ótýinshe, bastapqy nusqa ózgeriske ushyraǵan – alǵashqyda kún sáýlesin anyq eske túsiretin pishin usynyldy. Týdyń taǵy bir avtory Edıl Aıdarbekov týdyń jańa nusqasyn qarastyrǵanda kún sáýlesiniń beınesi ǵylymı turǵydan qarastyrylmaǵanyn aıtty.
Sondaı-aq talqylaý barysynda depýtat Dastanbek Djýmabekov týdyń jekelegen elemetterin ózgertý máselesin referendýmǵa shyǵarýdy usyndy. Halyq depýtaty Nurlanbek Azygalıev memlekettik rámizderdi ózgertpeý kerek dep aıtýǵa bolmaıtynyn aıtty. Depýtat Meıkınbek Abdalıevtiń pikirinshe, Qyrǵyzstan azamattarynyń pikirin eskerý qajet. Bul rette týdy túzetýge bastamashy bolǵan Ýlan Prımov osydan 32 jyl buryn týdy referendým emes, parlament bekitkenin basa aıtty.
Eske sala ketsek, Qyrǵyzstan prezıdenti Sadyr Japarov bul bastamany qoldaıtynyn bildirdi. Sondaı-aq memlekettik rámizdegi kún sáýlesiniń ózgerýin Qyrǵyz Respýblıkasynyń Ulttyq qaýipsizdik jónindegi memlekettik komıtetiniń basshysy Kamchybek Tashıev te qoldap, bul týraly Facebook paraqshasynda jazdy.
