Qyrǵyzstan parlamenti dárigerge kúsh kórsetkender úshin jaýapkershilik engizýdi maquldady

BІShKEK. KAZINFORM — Parlament dárigerler men muǵalimderge kúsh kórsetken úshin qylmystyq jaýapkershilik engizýdi maquldady. «Qylmystyq kodekske ózgerister engizý týraly» zań jobasyn búgin parlament otyrysynda densaýlyq saqtaý mınıstri Erkın Checheıbaev tanystyrdy, dep jazdy 24.kg.

Densaýlyq saqtaý mınıstri aıtýynsha, qyzmettik mindetin atqaryp jatqan qyzmetkerge qol kóterip, kúsh kórsetkeni úshin jaza engizý usynylyp otyr.

Joba densaýlyq saqtaý, bilim berý jáne memlekettik qyzmetter kórsetiletin basqa salalarda jumys isteıtin qyzmetkerlerdiń qaýipsizdigi men abyroıyn qorǵaýǵa baǵyttalǵan.

— Sońǵy ýaqytta medıtsına qyzmetkerlerine kúsh kórsetý men agressııa jaǵdaılary jıilep ketti. Bul máseleniń ózektiligin kórsetedi. Qylmystyq kodekste mundaı qylmystar úshin jaýapkershilik qarastyrylmaǵan. Sondyqtan bul ózgerister qajettilik retinde týyndady, — dedi mınıstr.

Aıta keteıik, jaqynda Prezıdent Qasym-Jomart Toqaev medıtsına qyzmetkerlerine kúsh kórsetkeni úshin jazany kúsheıtýdi tapsyrdy.

Sondaı-aq Májilis depýtaty Ashat Aımaǵambetov te elde medıtsına qyzmetkerlerine kúsh kórsetý derekteri jıilep bara jatqanyn aıtyp, bul máselege zań júzinde naqty ári qatań sharalar qabyldaý qajet ekenin alǵa tartqan bolatyn.