Qyrǵyzstan Ońtústik Koreıadan eki zamanaýı tikushaq satyp alady

ASTANA. KAZINFORM — Tótenshe jaǵdaılar mınıstrligi eki zamanaýı kópmaqsatty Ońtústik Koreıa óndirisindegi tikushaqty satyp alý boıynsha belsendi jumys júrgizip jatyr, dep habarlaıdy Kabar.

Bul týraly Tótenshe jaǵdaılar mınıstri Boobek Ajıkeev málimdedi. Ol bul sheshimniń Qyrǵyzstan prezıdenti Sadyr Japarovtyń tikeleı tapsyrmasymen qabyldanǵanyn atap kórsetti.

Tikushaqtar Korea Aerospace Industries (KAI) kompanııasy tarapynan jetkiziledi. Bul kez kelgen aýa raıyna tótep beretin, joǵary manevrli mashınalar, kúrdeli taýly jáne klımattyq jaǵdaılarda jumys isteýge arnalǵan. Jańa tehnıka azamattyq qorǵanys, qutqarý operatsııalary, medıtsınalyq evakýatsııa, gýmanıtarlyq mıssııalar jáne halyqty qorǵaý boıynsha basqa da mindetterde qoldanylatyn bolady.

— Bul — bolashaqtaǵy shyǵyndardy boldyrmaý jáne adam ómirin qutqarýǵa baǵyttalǵan strategııalyq ınvestıtsııa, — dedi Boobek Ajıkeev.

Eki tikushaqtyń quny shamamen 71 mıllıon AQSh dollaryn quraıdy, alaıda mańyzdysy — Ońtústik Koreıa tarapynan usynylǵan tıimdi qarjylandyrý boldy:

• paıyzdyq mólsherleme: 0,1%;

• qaryzdy óteý merzimi: 40 jyl;

• jeńildik kezeńi: 10 jyl (tólemsiz).

— Mundaı jaǵdaılar halyqaralyq standarttar boıynsha da sırek kezdesedi. Ár memleket joǵary tehnologııalyq tehnıkany osyndaı tıimdi sharttarmen satyp alý múmkindigine ıe bola bermeıdi, — dep atap ótti mınıstr.

Mınıstrdiń aıtýynsha, qazirgi tańda mınıstrliktiń qaramaǵynda úsh tikushaqtan turatyn avıatsııalyq baza bar, onyń birin Qyrǵyzstan halyqaralyq kelissózder aıasynda syılyq retinde alǵan.

Sonymen qatar, Tótenshe jaǵdaılar mınıstrligi materıaldyq-tehnıkalyq bazany nyǵaıtýdy jalǵastyryp jatyr. Sońǵy ýaqytta kóptep órt sóndirý jáne aýyr tehnıka, arnaıy qural-jabdyqtar men kıim-keshekter jetkizildi. Jańa ǵımarattar salynyp, qyzmetkerlerdiń eńbek jaǵdaılary jaqsaryp keledi.

Qazirgi tańda Qyrǵyzstanda Ońtústik Koreıanyń resmı bank delegatsııasy jumys istep jatyr. Qyrǵyz tarapymen birge tikushaqtardy satyp alý jáne tehnıkalyq-ekonomıkalyq negizdemeni kelisý boıynsha sońǵy kelissózder júrgiziledi.

Buǵan deıin Qyrǵyzstannan shyqqan qashyqtan jumys isteıtin mamandar Reseıdegi eńbek naryǵynda eń kóp suranysqa ıe frılanserler qataryna engenin jazǵanbyz.