Qyrǵyzstan ońtústiginde úsh márte jer silkindi
ASTANA. KAZINFORM — Qyrǵyzstan aýmaǵynda, qyrǵyz-tájik shekarasyna jaqyn jerde úsh jer silkinisi tirkeldi, dúmpý oshaǵynda eń joǵary magnıtýda 5,5 ball bolǵan, dep habarlaıdy Kazinform agenttiginiń Bishkektegi menshikti tilshisi.
Qyrǵyz Respýblıkasy Ulttyq ǵylym akademııasynyń Seısmologııa ınstıtýtynyń aldyn ala málimetteri boıynsha, birinshi jer silkinisi jergilikti ýaqyt boıynsha tańǵy saǵat 3:34–te tirkeldi. Dúmpýdiń oshaǵyndaǵy qarqyny 5,5 (magnıtýdasy 5,9) bolǵan. Epıtsentri Bor-Doobo eldi mekeninen soltústik-batysqa qaraı shamamen 14 km, Taldy-Sýdan ońtústik-shyǵysqa qaraı 20 km jáne Osh qalasynan ońtústik-shyǵysqa qaraı 110 km jerde ornalasqan.
Bor-Doobo eldi mekeninde Rıhter shkalasy boıynsha shamamen 5,0 ball, Taldy-Sýý, Archa-Bulaq jáne Sary-Mogolda Rıhter shkalasy boıynsha 4,0 ball, Daroot-Qorǵan men Nurda Rıhter shkalasy boıynsha 3,0 ball boldy.
Ekinshi jer silkinisi tańǵy saǵat 3:44–te tirkeldi, dúmpý oshaǵynda 3,5 ball (magnıtýdasy 3,9), epıtsentri Bor-Doobo aýylynan ońtústik-batysqa qaraı 1 km jerde ornalasqan. Bor-Doobo aýylynda dúmpý kúshi 3,5 ball boldy.
Tańǵy saǵat 4:50–de tirkelgen úshinshi jer silkinisiniń oshaǵynda 4,5 ball (magnıtýdasy 4,7) boldy. Epıtsentri Qyrǵyzstan men Tájikstan shekarasynda — Bor-Doobo aýylynan ońtústik-shyǵysqa qaraı 8 km, Sary-Tash aýylynan ońtústik-shyǵysqa qaraı 35 km jáne Osh qalasynan ońtústik-shyǵysqa qaraı 126 km jerde ornalasqan.
Bor-Dooboda shamamen 4,5 ball, al Taldy-Sýý, Sary-Tash, Qara-Kindik, Sary-Mogol jáne Nurada 3,5 ball sezildi.
Qyrǵyzstan men Tájikstan shekarasynda 28 qazan kúni de 4,7 baldyq jer silkinisi bolǵan edi.
Keshe Qytaıda 4,3 magnıtýdaly jer silkinisi tirkeldi.
