Qyrǵyzstan oń rýldi kólikterdiń Bishkekke kirýine tyıym salmaqshy

ASTANA.KAZINFORM — Bishkektegi keptelis máselesin sheshý úshin Qyrǵyzstan parlamentiniń depýtaty Elmýrza Satybaldıev el astanasy ákimdigine oń rýldi kólikterge tyıym salýdy usynyp otyr.

Parlamentshiniń aıtýynsha, kólik júrgizý mádenıetin arttyryp, jalpy erejelerdi saqtaý qajet. Jol qozǵalysy erejelerinde sol jaq rýldi kólikter joldyń oń jaǵymen júrýi belgilengen. Sonymen qatar, kólik quraldaryn tehnıkalyq baıqaýdan ótkizýdi engizý mańyzdy. Jaǵdaıy talapqa saı kelmeıtin aqaýly kólikter qalada apattyq jaǵdaı týǵyzyp, keptelisterge áser etedi.

— Qala ákimshiligi oń rýldi kólikterdiń el astanasyna kirýine tyıym salý týraly sheshim qabyldaýy múmkin dep oılaımyn. Qala syrtynda úlken avtoturaqtar salý kerek. Bishkekke jetken azamattar kólikterin turaqqa qaldyryp, qoǵamdyq kólikpen saparyn jalǵastyra aldy. Keptelispen kúresýge septigin tıgizetin bul ıdeıany ákimdikke qarastyrýdy usynamyn, — dep óz paıymymen bólisti depýtat.

Óz kezeginde Bishkek meri Aıbek Djýnýshalıev oń rýldi kólik ıeleri mundaı sheshimdi óz quqyqtaryn buzý retinde qabyldaýy múmkin ekenin atap ótti.

— Árıne, el astanasyna oń rýldi jáne aqaýy bar kólikterdiń sanyn azaıtý jaǵdaıdy jeńildetetin edi. Degenmen, azamattardyń quqyqtaryn eskerip, basqa da zańdarǵa sáıkes áreket etý kerek. Ákimdik bul máseleni óz betimen sheshe almaıdy, — dep túsindirdi ol.

Buǵan deıin Qyrǵyzstanda sheteldik kólikter zańdastyrylatyny habarlanǵan bolatyn.

Qyrǵyzstanda kólik salyǵy joq, jer salyǵynyń moratorııi 2030 jylǵa deıin uzardy.