Qyrǵyzstan mýzeılerin 1 mln-ǵa jýyq adam aralaǵan

ASTANA. KAZINFORM — 18 mamyrda álemde Halyqaralyq mýzeıler kúni atap ótiledi. Osyǵan oraı, Qyrǵyzstannyń Ulttyq statıstıka komıteti eldegi mýzeılerge qatysty qyzyqty derekterdi usyndy, dep habarlaıdy KAVAR.

Bul kúni barsha kelýshi mýzeılerge tegin kirip, kórme zaldaryn, jańa eksponattaryn kórip, tanymdyq aqparatty tyńdap, mádenıetpen sýsyndaıdy. Merekeniń basty urany — «Mýzeıler — mádenı almasýdyń, mádenıetterdi baıytýdyń jáne halyqtar arasyndaǵy ózara túsinistik, yntymaqtastyq pen beıbitshilikti damytý quraly».

Mereke aıasynda el boıynsha jańa kórmeler, festıvalder ashylyp, mýzeılerde taqyryptyq dárister, ekskýrsııalar, ǵylymı oqýlar, balalarǵa arnalǵan sabaqtar, teatrlandyrylǵan qoıylymdar uıymdastyrylady.

Qyrǵyzstan mýzeıleriniń qazirgi kelbeti:

• 2024 jyly respýblıkada 68 mýzeı jumys istegen.
• Barlyq mýzeıde 237 myńnan astam eksponat usynylǵan.

Eń kóp eksponattar ornalasqan óńirler:

• Bishkek qalasy — 75 myń eksponat.
• Ystyqkól oblysy — 41 myń.
• Osh qalasy — 34 myń.

Mýzeıge kelýshiler statıstıkasy (2024 jylǵy derekter):

• Barlyǵy 955 myń adam mýzeılerdi aralaǵan.
• Kelýshilerdiń eń kóp úlesi:
  • Osh qalasy — 34%-dan astam.
  • Bishkek qalasy — 29%-dan astam.
  • Chý oblysy — 10%-dan astam.
  • Ystyqkól oblysy — shamamen 8%.

Mádenı-aǵartýshylyq is-sharalar:

• 2024 jyly elde 35 mıllıonnan astam ekskýrsııa ótkizilgen.
• 915 myńnan astam dáris oqylǵan — olar eldiń tarıhı jáne mádenı murasyna arnalǵan.

Budan buryn habarlanǵandaı, budan bylaı Qyrǵyzstanda barlyq esep aıyrysý sommen júrgiziledi.