Qyrǵyzstan munaı men munaı ónimderin eksporttaýǵa ýaqytsha tyıym saldy
ASTANA.KAZINFORM - Qyrǵyzstan ishki naryqty otynmen qamtamasyz etý jáne tapshylyq boldyrmaý úshin munaı men munaı ónimderin avtomobıl jáne temirjol arqyly eksporttaýǵa ýaqytsha tyıym saldy, dep habarlaıdy Qyrǵyzstan Respýblıkasy Mınıstrler Kabınetiniń saıty.
Tıisti qaýly Mınıstrler Kabınetinde qabyldandy.
Qujatqa sáıkes, tyıym ishki naryq munaı ónimderimen tolyqqanǵa deıin nemese Eýrazııalyq ekonomıkalyq odaq (EAEO) sheńberinde munaı men munaı ónimderiniń ortaq naryǵy qalyptasqanǵa deıin kúshinde qalady.
Shekteýler munaı men munaı ónimderin, sonyń ishinde benzın, dızel otynyn jáne EAEO syrtqy ekonomıkalyq qyzmetiniń taýar nomenklatýrasy boıynsha jiktelgen basqa da otyndardy eksporttaýǵa qoldanylady.
Alaıda, tyıym Qyrǵyzstannan tys jerlerge óńdeý úshin eksporttalatyn, keıinnen elge tazartylǵan ónimderdi mindetti túrde ákeletin naftaǵa, mazýtqa jáne qyzdyrý maıyna qoldanylmaıdy. Memlekettik shekaradan ótetin kólikterdiń standartty otyn baktarynda saqtalatyn munaı ónimderine de erekshelik engizildi.
Sondaı-aq, qaýlyda Qyrǵyz Respýblıkasyna munaı men munaı ónimderiniń keıbir túrlerin avtomobıl kóligimen ımporttaýǵa ýaqytsha tyıym salý 2027 jyldyń 1 sáýirine deıin toqtatylady.
Mınıstrler kabıneti qabyldanǵan sharalar ishki munaı jáne munaı ónimderi naryǵynyń turaqty jumys isteýin qamtamasyz etýge, energetıkalyq qaýipsizdikti qorǵaýǵa, munaı ónimderiniń tapshylyǵyn boldyrmaýǵa jáne eldiń ishki qajettiligin qanaǵattandyrý úshin úzdiksiz jetkizilimdi qamtamasyz etýge baǵyttalǵanyn atap ótti.
Aıta ketelik Qyrǵyzstanda AI-95 benzınine memlekettik baǵa retteýi alynyp tastalǵan edi.
