Qyrǵyzstan munaı eksportyna tyıym saldy
ASTANA. KAZINFORM – Qyrǵyzstannyń mınıstrler kabıneti munaı men munaı ónimderin elden Eýrazııalyq ekonomıkalyq odaqtyń kedendik aýmaǵynan tysqary jerlerge shyǵarýǵa ýaqytsha tyıym saldy, dep habarlaıdy Kazinform agenttiginiń menshikti tilshisi.
Qyrǵyzstan Úkimeti qol qoıǵan qaýlyǵa sáıkes, EAEO TN VED kody 2709 boıynsha jiktelgen munaıdy jáne EAEO TN VED kody boıynsha 2710 sanattaǵy munaı ónimderin avtomobıl jáne temirjol kóligimen eksporttaýǵa ýaqytsha tyıym salyndy. Tek otandyq munaı óńdeý zaýyttary óndiretin mazýt jáne qyzdyrý mazýtyn (EAEO TN VED kody 2710) shyǵarýǵa ruqsat etiledi.
Sheshim resmı jarııalanǵan kúninen bastap qoldanysqa engiziledi.
Esterińizge sala keteıik, 30 qyrkúıekte Reseı úkimeti ishki otyn naryǵyndaǵy turaqtylyqty saqtaý úshin benzın eksportyna ýaqytsha tyıym salý merzimin uzartyp, otynnyń basqa túrlerine shekteý qoıǵan bolatyn. Shekteý 2025 jyldyń 31 jeltoqsanyna deıin kúshinde bolady jáne barlyq eksporttaýshylarǵa, sonyń ishinde tikeleı óndirýshilerge de qatysty.
Eske sala keteıik, buǵan deıin álemde munaıǵa suranys táýligine 378 mln barrelge deıin artatynyn habarlaǵanbyz.