Qyrǵyzstan Mınıstrler kabınetiniń tóraǵasy Almatyǵa jumys saparymen keledi
ASTANA. KAZINFORM – Mınıstrler Kabınetiniń Tóraǵasy – Qyrǵyzctan Respýblıkasy Prezıdenti Ákimshiliginiń Basshysy Aqylbek Japarov 1-2 aqpan kúnderi Almatyda ótetin Eýrazııalyq úkimetaralyq keńestiń (EÚAK) otyrysyna jáne «Digital Almaty 2024: X Indýstrııasy» halyqaralyq tsıfrlyq forýmyna qatysady.
Qyrǵyzstan Respýblıkasy Mınıstrler Kabıneti baspasóz qyzmetiniń málimetinshe, EÚAK otyrysy barysynda EAEO-ǵa múshe memleketterdiń úkimet basshylary saýda-ekonomıkalyq yntymaqtastyqtyń keń aýqymdy máselelerin, sondaı-aq tehnıkalyq retteý, biriktirilgen aqparattyq júıe jáne basqa da ózekti taqyryptardy qarastyrady.
A.Japarov EAEO elderiniń premer-mınıstrlerimen birge Digital Almaty jyl saıynǵy tsıfrlyq forýmynyń plenarlyq otyrysyna qatysady. Onda kórnekti halyqaralyq jáne qoǵam qaıratkerleri, iri IT-kompanııalar men bıznes basshylary sóz sóıleıdi.
Budan bólek, jumys sapary aıasynda Qyrǵyzstan Respýblıkasy delegatsııasy basshysynyń birqatar ekijaqty kezdesýleri ótedi. Qyrǵyzstannyń Úkimet basshysy Reseı Federatsııasy Úkimetiniń tóraǵasy Mıhaıl Mıshýstınmen jáne Qazaqstan Premer-Mınıstri Álıhan Smaıylovpen kezdesedi.
«Kezdesýler barysynda taraptar kóp josparly yntymaqtastyqtyń ózekti máselelerin talqylap, birqatar mańyzdy baǵyttaǵy kelisimderdi júzege asyrýǵa qatysty «saǵattaryn salystyryp tekseredi», - delingen habarlamada.
2 aqpanda Almatyda Eýrazııalyq úkimetaralyq keńestiń (EÚAK) otyrysy ótedi. Sharaǵa Qazaqstan, Armenııa, Belarýs, Qyrǵyzstan, Reseı elderiniń úkimet basshylary men Eýrazııalyq ekonomıkalyq komıssııa Alqasynyń tóraǵasy qatysady.
