Qyrǵyzstan men Tájikstan shekara jóninde kelisti

BІShKEK. KAZINFORM – Qyrǵyzstan prezıdenti Sadyr Japarov Kabar agenttigine bergen suhbatynda qyrǵyz-tájik shekarasyn retteýdiń sharttary týraly baıandady, dep habarlaıdy Kazinform menshikti tilshisi.

Memleket basshysynyń habarlaýynsha, qyrǵyz-tájik shekarasy máselesi is júzinde sheshildi. Qazirgi ýaqytta qujattardy rásimdeý boıynsha ekijaqty jumys júrgizilip jatyr.

- Jumystar aıaqtalǵannan keıin úkimetaralyq komıssııalar, sodan keıin syrtqy ister mınıstrleri qol qoıady. Osy protsedýralardyń barlyǵynan keıin kelisimdi eki eldiń parlamentteri ratıfıkatsııalaıdy. Kelesi kezekte qujatqa eki eldiń prezıdentteri qol qoıady, odan keıin notalarmen almasý ótedi. Shekarany anyqtaý jumystary taǵy bir-eki jyl jalǵasady, sodan keıin ǵana bul protsess tolyǵymen aıaqtalady. Eń bastysy, biz ekijaqty kelisimge keldik, - dep málimdedi prezıdent.

Sadyr Japarovtyń atap ótýinshe, eki el arasyndaǵy shekaralyq daýlardy sheshý kezinde eki taraptyń da múddeleri eskeriledi.

- Bizdiń myń shaqyrymǵa jýyq shekaramyz bar. Kóptegen ýchaskede daýly aýmaqtar boldy. Keı jaǵdaılarda bul aımaqtar teń sheshildi. Sonymen qatar, úıleri shahmat úlgisinde ornalasqan shekaralyq aýyldar bar. Bul máseleni de sheshtik. Áıtpese, shekarany kúzetý eki jaqqa da úlken qolaısyzdyq týdyryp otyr, - dep túsindirdi ol.

Prezıdenttiń aıtýynsha, máseleler jerdiń árbir metrin esepke ala otyryp sheshilgen. Tájik tarapy úıleri qyrǵyz jaǵyna ótip ketken azamattaryn qonystandyrady. Qyrǵyzstan da jer telimderiniń kólemin eskere otyryp, basqa jerge úı salyp, azamattaryn óz aýmaǵyna kóshirmek.

Buǵan deıin qyrǵyz-tájik memlekettik shekarasy máselesi 2025 jyldyń qańtar aıynyń sońyna qaraı sheshiletinin jazǵan bolatynbyz.