Qyrǵyzstan men Tájikstan shekara máselesin qalaı sheshti
BІShKEK. KAZINFORM – Jogorký Kenesh komıtetteriniń birlesken otyrysynda Qyrǵyzstan men Tájikstan arasyndaǵy memlekettik shekara týraly úsh kelisim maquldandy, dep habarlaıdy Kazinform menshikti tilshisi.
Depýtattar kelesi qujat jobalaryn biraýyzdan maquldady:
· Qyrǵyz-tájik memlekettik shekarasy týraly shart;
· Qyrǵyzstan men Tájikstan arasynda avtomobıl joldaryn salý jáne paıdalaný, avtojol qıylysyn damytý jáne paıdalaný týraly kelisim (Tort-Kocho);
· Eki eldiń úkimetteri arasyndaǵy sý sharýashylyǵy jáne energetıkalyq nysandarǵa qoljetimdilikti qamtamasyz etý týraly kelisim.
Kezdesý barysynda Qyrǵyz Respýblıkasy UQMK tóraǵasy Qamchybek Tashıev parlamentarıılerge birlesken memlekettik shekarany sıpattaý máselesi boıynsha tájik tarapymen qol jetkizilgen ýaǵdalastyqtardyń egjeı-tegjeıleri týraly aıtyp berdi.
Onyń aıtýynsha, Leılek óńirin sıpattaǵanda Qyrǵyzstan men Tájikstan 190 ga jerdi ózara aıyrbastap alǵan.
- Tájikstannyń Kaıragach ýchaskesindegi 155 gektar, Kaıragach anklavyndaǵy 35 gektar jer Qyrǵyzstanǵa berildi.
- Tájikstan Saadta 21 ga, Razzakovta 23,5 ga, Selkanda 4 ga, Maıtyda 7 ga, Proletarskide 12,5 ga, Ýlak-Jaıda 15 ga, Ak-Arykta 7 ga, Kara-Bakta 65 ga, sondaı-aq Maıtyda 35 ga jer aldy.
Batken oblysynyń Batken aýdany men Soǵdy oblysynyń Isfara aýdanynyń aýmaqtary retteldi. Osylaısha, tájik tarapy 141,9 ga jer alady: Batken oblysyndaǵy Dostýk aýyly (91 ga), Mazeıit ýchaskesi (8,3 ga), Kok-Terek aýylynyń jeri (17,5 ga), Tash-Týmshýk aýylynyń jeri (20,1 ga), Dacha ýchaskesi (5 ga).
Óz kezeginde Qyrǵyzstanǵa 142,7 ga jer beriledi: Somonıen aýyly (18,4 ga), Dahma ýchaskesi (3,1 ga), Hodjı-Aılo aýylynyń bir bóligi (21,5 ga), Govsývar (2,7 ga), Mın-Býlak (42 ga), Lakkon ýchaskesinegi jer (5 gektar). Qyrǵyzstannyń Dostýk aýylyndaǵy jańa úılerdiń ótemaqysy retinde Lakkonnan 30 gektar sýarmaly jer alady.
Kelissózder qorytyndysy boıynsha Vorýh anklavynyń aýmaǵy 19 myń ga-dan 14,5 myń ga-ǵa deıin qysqardy. Qyrǵyz Respýblıkasy anklav tóńiregindegi myń gektar jaıylymnan bas tartyp, onyń ornyna Qaraǵan-Saı aımaǵyndaǵy Chon-Alaı óńirindegi dál sondaı aýmaq jerdi aldy.
Taraptar sondaı-aq beıtarap statýstaǵy joldardy salý jáne paıdalaný týraly kelisimge keldi: ·
• Tájikstan uzyndyǵy 3425 metr jáne eni 40 metr Dacha-Kapchygaı-Hojaı-Aalo-Vorýh jolyn salady jáne paıdalanady;
• Qyrǵyzstan uzyndyǵy 3241 metr, eni 40 metr bolatyn Mın-Orýk-Samarkandek-Orıen-Shýrıston jolyn salyp, paıdalanady.
Sondaı-aq, Tórt-Kocho jolynyń 253,74 metr ýchaskesine beıtarap statýs beriledi.
Qyrǵyz Respýblıkasy arnaıy qyzmetiniń basshysy elder arasyndaǵy «Golovnoı» sýaıryǵy ekige bólinetinin habarlady.
– Shekara ózen arnasymen ótetindikten, tájik tarapy bólýdi surady, biz qarsy boldyq. Aqyry 1,5 lıýk ózimizge, 1,5 lıýk tájikterge tıesili bolady dep kelistik. Barlyǵy úsh lıýk bar. Osy 3-4 metr jerdiń ornyna ótemaqy retinde 750 ga jer aldyq, - dedi ol.
Qyrǵyzstan keliskeni úshin Ýnjý-Býlaktan 500 ga, Sýlıýtýge kireberis mańyndaǵy Karool-Donda 100 ga, Katta-Týzdan 150 ga jer alady.
- Bul ýchaske daýly boldy, ol jerde buryn 300 ga-ǵa teń bólingen munaı uńǵymalary bar. Jalpy, «Golovnoı» sýaıryǵy boıynsha aıyrbas retinde biz 750 ga jer aldyq, - dedi Q.Tashıev.
Osyǵan deıin Qyrǵyzstan men Tájikstannyń shekara máselesin tolyq rettegeni týraly jazǵan edik.