Qyrǵyzstan men Tájikstan memlekettik shekarada alǵashqy baǵanalardy ornatty
ASTANA. KAZINFORM — Qyrǵyzstan men Tájikstan memlekettik shekarada alǵashqy shekara baǵanalaryn ornatýdy bastady, dep habarlaıdy Kabar.
Memlekettik shekarany demarkatsııalaý jumystarynyń kezekti kezeńi aıasynda Qyrǵyzstan men Tájikstan ókilderi búgin Qyrǵyzstan, Tájikstan jáne Ózbekstannyń memlekettik shekaralary túıisetin núkteden bastalatyn ýchaskede alǵashqy shekara baǵanalaryn birlesip ornatýǵa kiristi.
Qyrǵyzstan Mınıstrler kabınetiniń málimetinshe, Qyrǵyzstan men Tájikstan arasyndaǵy memlekettik shekaranyń jalpy uzyndyǵy 1008,14 shaqyrymdy quraıdy. Al beıtarap mártebege ıe jer ýchaskeleriniń jalpy perımetri 14,07 shaqyrym.
2002 jylǵy jeltoqsanda bastalǵan memlekettik shekarany delımıtatsııalaý úderisiniń tolyq aıaqtalýy eki kórshi memleket arasyndaǵy qarym-qatynasta jańa kezeńniń bastalýyna jol ashqan tarıhı jetistik retinde baǵalandy.
Bıylǵy 13 naýryzda Bishkek qalasynda eki el basshylary Qyrǵyz Respýblıkasy men Tájikstan Respýblıkasy arasyndaǵy memlekettik shekara týraly shartqa qol qoıdy. Bul qujat ózara senimdi nyǵaıtýǵa, uzaq merzimdi turaqtylyqty qamtamasyz etýge jáne shekara mańyndaǵy aýmaqtardyń ornyqty damýyna berik halyqaralyq-quqyqtyq negiz qalady.
Memleket basshylarynyń tapsyrmalaryn oryndaý maqsatynda Qyrǵyz Respýblıkasy men Tájikstan Respýblıkasy úkimettik delegatsııalarynyń birlesken qyrǵyz-tájik demarkatsııalyq komıssııasy aıasynda arnaıy jumys toptary qurylyp, demarkatsııalaý sharalaryn is júzinde júzege asyrýǵa kiristi.
Jumystar taraptardyń ózara túsinistigi, syndarly yntymaqtastyǵy jáne joǵary jaýapkershiligi jaǵdaıynda júrgizilip jatyr.
Demarkatsııalaý bastalǵannan beri memlekettik shekaranyń 416,01 shaqyrym bóliginde birlesken dalalyq zertteý jumystary júrgizildi. Sonymen qatar Batken oblysynyń Batken jáne Láılek aýdandary, sondaı-aq Tájikstannyń Soǵdy oblysyndaǵy Isfara jáne Konıbod qalalaryna, Bobojon Ǵafýrov, Jabbor Rasýlov, Spıtamen jáne Devashtıch aýdandaryna shektes aýmaqtarda 1627 shekara belgisiniń (1954 shekara baǵanasynyń) aldyn ala koordınattary men ornatylatyn oryndary anyqtalyp, aǵash jáne metall qazyqtarmen belgilendi.
Bıylǵy 14 shildede demarkatsııa jumystarynyń kezekti kezeńi aıasynda eki eldiń ókilderi Qyrǵyzstan, Tájikstan jáne Ózbekstannyń memlekettik shekaralary túıisetin núkteden bastalatyn ýchaskede tórt shekara baǵanasyn birlesip ornatty.
Bul praktıkalyq qadam joǵary deńgeıde qol jetkizilgen kelisimderdiń dáıekti túrde júzege asyrylyp jatqanyn jáne taraptardyń ózara senim, áriptestik pen tatý kórshilik rýhyndaǵy yntymaqtastyǵynyń joǵary tıimdiligin aıqyn kórsetedi.
Taraptardyń pikirinshe, memlekettik shekarany halyqaralyq quqyq talaptaryna saı tolyq resimdeý jáne ony tıisti túrde belgileý óńirlik qaýipsizdikti nyǵaıtýdyń, shekara mańyndaǵy aýmaqtardyń ornyqty áleýmettik-ekonomıkalyq damýyn qamtamasyz etýdiń, ózara tıimdi yntymaqtastyqty keńeıtýdiń jáne Qyrǵyzstan men Tájikstan halyqtary arasyndaǵy dostyq qatynastardy odan ári tereńdetýdiń mańyzdy faktory sanalady.
Buǵan deıin Qyrǵyzstan munaı men munaı ónimderin eksporttaýǵa ýaqytsha tyıym salǵanyn jazdyq.
