Qyrǵyzstan men Tájikstan memlekettik shekara máselesin túpkilikti qashan sheshedi

BІShKEK. KAZINFORM – Qyrǵyz-tájik memlekettik shekarasy máselesi 2025 jyldyń qańtar aıynyń sońyna qaraı sheshiledi, dep habarlaıdy Kazinform menshikti tilshisi. 

Mınıstrler kabıneti tóraǵasynyń orynbasary, Qyrǵyz Respýblıkasy UQMK basshysy Kamchybek Tashıevtiń aıtýynsha, qazirgi kezde qyrǵyz-tájik shekarasyn sıpattaýdy aıaqtaýdyń belsendi kezeńi júrip jatyr.

— Shekaranyń búkil syzyǵy boıynsha kelisim jasaldy, 50 shaqyrymdaı jer qaldy. Tájikstannyń shekarany delımıtatsııalaý jáne demarkatsııalaý jónindegi memlekettik komıssııasy Bishkekte júr. Qańtar aıynyń sońyna deıin sıpattaý jumystary aıaqtalady dep oılaımyn, - dedi arnaıy qyzmet basshysy.

K.Tashıev Naýryz merekesine deıin Qyrǵyzstan men Tájikstan prezıdentteri ratıfıkatsııaǵa qol qoıyp, notalar almasady degen úmitin bildirdi.

— Osylaısha, eki memleket arasynda memlekettik shekarany belgileý boıynsha barlyq jumystar zańdy túrde aıaqtalady, - dep qorytyndylady Qyrǵyz Respýblıkasy UQMK tóraǵasy.

Buǵan deıin Qyrǵyzstan men Tájikstan memlekettik shekarany belgileý jumystaryn aıaqtaǵanyn jazǵan bolatynbyz.